6:634  quidnam  expediat:  nam  nec  Paulus  coram  sacerdotibus  primum,  deinde  coram  proconsule  disertis  verbis,  quid  de  religione  sentiat,  exponit:  neque  vero  supersedet,  quia  studeat  vitae  suae  parcere  (nam  ad  mortem  quasi  devoto  animo  ferebatur)  sed  quia  non  esse  utile  iudicat.  Christi  diversa  est  ratio.  Tacet  enim  de  multis  coram  Pilato,  quia  tribunal  illud  erat  non  agendae  causae,  sed  audiendae  damnationis.  Verum,  de  necessario  aliquo  religionis  capite  dum  rogamur,  illic  subticere  periculosum:  dicere  autem,  quo  te  impietatem  approbare  prae  te  feras,  prorsus  indignum  est  christiano  pectore.  Non  praescribo  nominatim,  quousque  progrediaris:  sed  duo  venire  tibi  in  mentem  volo:  te  illic  tanquam  Dei  manu  sisti,  ad  edendam  fidei  professionem:  deinde  sophisticen  illi  esse  exosam.  Nunc  videamus,  suffugium  illud  quorsum  spectet.  [pag.  123]  Quid  de  peccatorum  remissione  sentis  ?  gratuitamne,  an  satisfactionibus  redimi?  Quod  sancta  credit  ecclesia.  Nam  si  veram  appelles,  exprimere  te  cogent,  de  qua  loquaris.  Quorsum  hoc  totum?  nisi  ut  illis  gratificeris.  Mea,  inquies,  nihil  interest,  modo  evadam.  Cupio  infestissimos  dimittere,  modo  ne  gladium  illis  nimis  aperta  confessione  porrigam.  Sed  quis  est  hic  ecclesiae  praetextus?  Nonne  ideo  evadis,  quia  te  in  ecclesiae  romanae  servitutem  reductum  esse  putant?  Quos  porro  theologos  intelligent,  nisi  suos;  hoc  est,  omnium  blasphemiarum  architectos?  Eorum  te  iudicio  submittis,  ut  paratus  sis  subscribere  omnibus  eorum  placitis,  quae  omni  impietate  referta  esse  constat.  Hoc  si  tibi  semel  permiseris,  cur  non,  eodem  iure,  fraenum  tibi  magis  laxes  subinde  ac  magis,  ut  illis  in  speciem  ad  quaevis  postulata  annuas?  Gratuitane  est  remissio  peccatorum,  an  satisfactione  constat?  Sane.  Intus  enim  tibi  canis,  Christum  satisfecisse.  Credis  purgatorium?  Quidni?  Christi  enim  sanguine  purgamur.  Hoc  posterius  tacitum  devorabis.  Audietur  interim  ex  ore  tuo  aperta  blasphemiae  simulatio.  Ubi  illa  promissio?  Dabitur  vobis  illa  hora,  quid  loquamini,  etc.  (Matth.  10,  19).  Audebimusne  eiusmodi  confessioni  inscribere  [pag.  124]  spiritum  sanctum  autorem?  Qualis  porro  erit  hic  Dei  martyr,  qui  impietati  palam  suffragabitur?  Summa  haec  sit:  omnes  obliquas  responsiones,  quibus  impiorum  furorem,  tanquam  veritatis  abnegatione,  placare  studemus,  alienas  Christianis  esse  censeo.  Nam  et  Deus  sophisticen,  ut  dixi,  abominatur:  nec  multum  interest,  quibus  verbis  eiures  fidei  professionem,  si  tibi  propositum  est  impiis  et  Christi  hostibus  significationem  consensus  dare.