48:634  que,  si  nous  nous  laissons  gouverner  par  luy,  nous  sentirons  qu'il  nous  sera  bonne  guide  et  seure,  et  que  la  vertu  de  son  sainct  Esprit  est  infinie  pour  nous  maintenir.  En  premier  lieu  donc,  quand  nous  venons  a  ceste  saincte  table,  cognoissons  que  c'est  un  secret  qui  surmonte  tous  nos  sens,  et  pourtant  qu'il  faut  yci  donner  lieu  a  la  foy.  Et  que  nous  scachions  que  ce  qui  ne  se  peut  concevoir  par  les  hommes,  s'accomplit  neantmoins  par  la  grace  secrete  et  invisible  du  S.  Esprit:  car  voyla  comme  nous  sommes  faits  participans  du  corps  et  du  sang  de  Iesus  Christ.  Au  reste,  quand  il  habitera  en  nous,  et  que  nous  serons  vrayement  son  corps,  ne  doutons  pas  que  tout  ce  qui  est  dit  en  Isaie  des  graces  de  l'Esprit  ne  nous  appartiene  et  ne  nous  soit  approprie.  Il  est  vray  que  nous  ne  recevrons  pas  le  sainct  Esprit  en  toute  perfection,  car  il  y  a  la  mesure  du  don,  comme  S.  Paul  en  parle,  et  il  faut  que  nous  croissions  de  plus  en  plus.  Aussi  ce  n'est  point  sans  cause  que  nostre  Seigneur  nous  en  distribue  ainsi  par  portion  certaine  et  par  degrez:  car  il  est  besoin  que  sa  vertu  se  parface  en  nostre  foiblesse,  afin  que  nous  dependions  tousiours  de  luy,  que  nous  soyons  solicitez  de  l'invoquer:  et  qu'aussi  nous  soyons  humiliez,  cognoissans  qu'il  y  a  encores  beaucoup  a  redire  en  nous.  Toyla  donc  comme  nous  cognoistrons  que  ce  n'est  pas  en  vain  que  Iesus  Christ  habite  en  nous,  car  il  nous  rendra  tesmoignage  par  effet  que  son  sainct  Esprit  desployera  sa  vertu  pour  nous  fortifier  en  luy,  pour  nous  y  attirer  et  pour  nour  retirer  hors  de  ce  monde.  Il  est  dit  la  en  ce  passage  d'Isaie  que  l'Esprit  de  sagesse  est  repose  sur  luy,  pour  monstrer  qu'il  n'y  a  en  nous  que  tenebres,  que  nous  sommes  povres  aveugles,  et  qu'au  lieu  que  nous  cuidons  estre  bien  habiles  et  subtils,  nous  pervertirons  tousiours  et  falsifierons  la  verite  de  Dieu,  iusques  a  ce  qu'il  nous  ait  illuminez,  et  qu'il  nous  ait  donne  une  clarte  celeste,  laquelle  nous  n'avons  point  de  naissance  ne  d'heritage.  Et  puis  il  est  dit  qu'il  ha  aussi  l'Esprit  de  crainte  de  Dieu,  pource  que  nos  appetis  sont  autant  de  rebellions  a  l'encontre  de  la  volonte  de  Dieu,  iusqu'a  ce  qu'ils  soyent  reformez,  voire  changez  du  tout.  Apres  il  est  dit  qu'il  ha  aussi  bien  l'Esprit  de  vertu,  afin  que  nous  cognoissions  nostre  foiblesse,  et  qu'il  ne  faudroit  rien  pour  nous  faire  defaillir,  sinon  que  nous  fussions  fortifiez  d'enhaut.  Nous  sentirons  donc  toutes  ces  choses  quand  nous  viendrons  recevoir  le  tesmoignage  qui  nous  est  yci  donne,  et  que  nous  serons  persuadez  que,  comme  les  hommes  mortels  distribuent  le  pain  et  le  vin,  nostre  Seigneur  Iesus  Christ  besongnera,  d'autant  que  cela  se  fait  par  son  authorite  et  en  son  Nom,  et  que  ce  n'est  pas  une  chose  que  les  hommes  ayent  controuvee  en  leur  cerveau,  mais