25:634  soyent  point  effeminez,  et  qui  ayent  dequoy  pour  fournir  a,  une  telle  charge,  qu'ils  ayent  bon  zele,  et  courage,  et  magnanimite.  Or  d'autant  que  sans  la  crainte  de  Dieu,  toutes  les  vertus  des  hommes  sont  converties  en  mal,  voici  Iethro  qui  n'a  iamais  ouy  un  seul  mot  de  l'Escriture  saincte,  qui  toutesfois  cognoist  bien  qu'il  est  impossible  que  un  homme  s'acquittast  de  son  devoir  quand  il  aura  a  gouverner  un  peuple,  qu'il  ne  craingne  Dieu.  Si  un  Payen  a  ainsi  parle,  quelle  honte  sera-ce  pour  nous,  quand  auiourd'huy  nous  aurons  moins  de  discretion?  et  toutesfois  on  peut  voir  a  l'oeil  comme  il  en  va.  A-on  ceste  cognoissance,  quand  il  est  question  d'eslire  gens  qui  gouvernent  la  iustice,  qu'il  faut  que  ceci  aille  en  premier  lieu,  c'est  assavoir,  que  la  crainte  de  Dieu  y  soit?  Il  est  vray  qu'encores  confessera-on,  et  nature  nous  y  contraint,  de  dire  qu'il  faut  avoir  gens  prudens,  gens  vertueux,  voire  comme  s'il  y  avoit  ne  prudence  ne  vertu,  si  la  crainte  de  Dieu  ne  domine.  Et  puis  Iethro  pour  mieux  exprimer  les  fruits  de  la  crainte  de  Dieu,  il  adiouste:  Qu'il  y  ait  droiture  et  verite:  comme  s'il  disoit,  que  iamais  un  homme  ne  sera  propre  pour  gouverner,  sinon  qu'il  y  ait  rondeur  en  luy,  qu'il  ne  soit  point  double,  mais  qu'il  y  aille  en  bonne  conscience.  Et  d'autant  que  les  corruptions  aveuglent  les  yeux  des  sages,  et  pervertissent  l'equite  des  bons,  il  dit  que  si  on  veut  avoir  gens  propres  pour  dominer,  qu'il  faut  qu'ils  hayssent  l'avarice,  qu'ils  mesprisent  les  biens  de  ce  monde  pour  s'en  savoir  passer.  Quand  donc  un  telle  lecon  nous  est  monstree  par  un  Payen,  ie  vous  prie,  quelle  vergongne  sera-ce,  que  nous  qui  faisons  profession  d'estre  nourris  en  la  Loy  de  Dieu  et  en  son  Evangile,  et  qui  en  avons  les  aureilles  tant  battues,  que  nous  soyons  encores  nouveaux  a  ceste  doctrine,  et  qu'elle  soit  pour  le  moins  si  mal  pratiquee  entre  nous?  Et  tant  y  a  que  si  nous  n'en  faisons  nostre  profit,  elle  est  escrite  pour  estre  gardee  a  nostre  grande  confusion,  et  pour  nous  rendre  inexcusables.  Ainsi  donc  poisons  bien  ce  qui  est  ici  dit,  que  Moyse  exhorte  le  peuple  de  choisir  gens  entendus  et  prudens,  et  puis  esprouvez:  car  si  on  ordonne  par  esperance  quelqu'un,  et  qu'on  ne  l'ait  point  bien  cognu  ni  experimente,  n'est-ce  point  prophaner  le  siege  de  Dieu  et  de  la  iustice?  Voila  Dieu  qui  se  reserve  toute  principaute  par  dessus  les  hommes,  comme  aussi  il  en  est  digne:  cependant  il  se  veut  servir  toutesfois  des  hommes  mortels,  comme  de  ses  ministres  et  officiers:  mais  si  est-ce  que  le  siege  de  iustice  luy  est  comme  sacre,  ainsi  qu'il  sera  monstre  en  la  lecture  prochaine.  On  ira  prendre  des  gens  a.  l'aventure,  et  ne  sait  on  ce  qu'ils  doyvent  faire,  ne  comment  ils  se  doyvent  porter.  Et  bien  il  faut  essayer  que  cestuy-ci  peut  faire,  quand  ils  sera  la  assis  il  regardera  a  soy.  Voire,  celuy  qui  ne  vou-