5:632  Et  comme  ainsi  soit  que  le  principal  office  d'un  Evesque  soit  d'enseigner  le  peuple,  il  ne  fault  permettre,  que  les  Evesques  facent  cela  par  aultruy.  Car  comme  S.  Paul  commande,  il  fault  eslire  ceulx  qui  sont  propres  a  enseigner  et  aussi  voluntaires.  Pareillement  les  Evesques  doyvent  en  propre  personne  visiter  le^  Eglises  de  leur  diocese.  Pourtant  les  sainctz  Peres  ont  voulu  les  dioceses  estre  tellement  mesurez  et  limitez,  que  chascun  Evesque  peust  tous  les  ans  en  personne  aller  d'Eglise  en  Eglise,  et  luymesme  congnoistre  du  gouvernement  d'icelles.  Et  pourtant  il  fauldra  aussi  adviser  a  ce,  que  les  Canons  commandent  d'instituer  nouveaux  eveschez,  la  ou  le  peuple  sera  creu:  affin  que  nulle  cite  fort  peuplee  ne  soit  despourveue  d'Evesque.  Pareillement  les  Prestres  ne  doyvent  estre  occupez  a  aultre  chose  sinon  a  enseigner  le  peuple,  et  prescher  la  parolle  de  Dieu,  administrer  les  Sacremens,  et  veiller  a  la  discipline.  Pourtant  au  Concile  de  Romme,  soubz  sainct  Gregoire,  sont  excommuniez  les  prestres,  lesquelz  negligeant  la  charge  d'enseigner,  vacquent  a  chanter  en  l'Eglise.  Le  mesme  concile  defend  aux  Diacres  de  s'occuper  en  chantreries  ecclesiasticques,  laissant  derriere  leur  propre  office,  [fol.  145]  qui  est  de  dispenser  les  aulmosnes,  assister  a.  l'Evesque,  et  aux  prestres,  en  la  discipline.  Il  fault  doncques  incontinent  qu'il  se  pourra  commodement  faire  oster  cest  abuz,  qu'on  departit  le  revenu  des  Eglises  en  certaines  prebendes,  et  qu'icelles  prebendes  soyent  conferees  a  gens  qui  n'ont  aultre  office  que  de  chanter  et  faire  le  service,  comme  on  appelle.  Car  apres  qu'on  aura  ordonne  le  revenu,  qui  doit  estre  employe  aux  gages  de  ceux  qui  ont  les  principaux  offices  et  plus  necessaires,  comme  les  Evesques  et  les  Prestres,  qui  sont  dispensateurs  de  la  doctrine  et  des  Sacremens,  et  correcteurs  des  vices:  Item  les  Diacres  et  soubz  Diacres,  qui  doyvent  avoir  principallement  le  soing  des  paovres  et  des  aulmosnes:  Le  reste  du  revenu  doit  estre  applique  aux  paovres  et  aux  escoliers  qu'on  prepare  au  service  des  Eglises,  et  assigne  a  un  chascun  selon  que  requiert  sa  necessite;  laquelle  distribution  se  faisoit  anciennement  par  l'authorite  de  l'Evesque  et  des  prestres,  non  pas  toutesfoys  sans  le  conseil  des  Diacres.  Mais  pource  que  par  le  mauvais  gouvernement  du  clerge,  tout  cest  ordre  a  este  renverse:  il  seroit  expedient  de  mettre  remede  a  la  confusion  qui  est  maintenant,  tel  que  le  mit  Ioas  roy  de  Iudee.  Car  pource  que  les  Prestres  tournoyent  a  leur  prouffit  particulier,  tout  ce  qui  s'offroit  au  Temple,  il  ordonna  son  scribe  sur  les  comptes  avec  le  grand  sacrificateur,  affin  que  rien  ne  perit  par  fraude  (2  Rois  12,  6  suiv.).  Ainsi  auiourdhuy  il  seroit  utile,  qu'on  adioingnit  aux  Prestres  et  Diacres,  quelques  hommes  de  bien  d'estat  seculier,  comme