48:632  cruaute  contre  les  povres  fideles.  Et  aussi  on  voit  "comme  ces  malheureux  tyrans  sont  possedez  de  Satan,  et  qu'il  y  a  une  telle  frenesie  en  eux  qu'il  n'y  a  plus  d'esperance  de  les  flechir  en  facon  que  ce  soit.  Or  nos  povres  freres  sont  la  exposez  en  proye,  ils  sont  veillez  et  espiez:  et  voit  on  qu'il  y  ait  un  preparatif  le  plus  grand  de  rage  et  de  cruaute  qu'on  scauroit  penser,  et  que  l'obstination  des  meschans  a  l'encontre  de  Dieu  est  plus  incorrigible  qu'elle  ne  fut  iamais.  C'est  donc  bien  a  nous,  cependant  que  Dieu  nous  donne  le  loisir,  d'y  penser  a  bon  escient,  et  de  prattiquer  ceste  histoire  que  nous  voyons:  ascavoir  puis  que  le  S.  Esprit  est  descendu  sur  ceux  qui  estoyent  d'un  accord,  que  nous  apprenions  de  nous  assembler,  et  combien  que  nous  soyons  loin  des  coups,  que  toutesfois  nous  soyons  conioints  avec  ceux  qui  bataillent,  et  que  nous  leur  aidions  au  combat  par  nos  prieres  et  oraisons  :  tellement  que  l'Esprit  de  Dieu  conduise  le  tout,  et  qu'il  nous  enflamme  d'un  tel  zele  que  nous  soyons  ardens  a  invoquer  nostre  Dieu,  au  lieu  que  nous  sommes  par  trop  froids.  Et  quant  a  nos  freres  qui  ont  besoin  d'estre  confermez  en  tels  assaux  qu'ils  ont  a  soustenir,  que  ce  bon  Dieu  monstre  que  c'est  luy  qui  a  besongne  en  eux,  et  qu'il  les  conduit  et  gouverne.  Au  reste,  il  nous  faut  bien  noter  encores  ce  mot  de  Consentement  et  d'accord,  pour  nous  ramener  au  Chef,  qui  est  nostre  Seigneur  Iesus  Christ.  Car  on  verra  comme  l'Evangile  se  presche  auiourd'huy:  mais  si  on  fait  un  recueil  des  fideles,  le  nombre  s'en  trouvera  bien  petit  et  bien  clair  seme:  car  il  n'y  a  gueres  de  lieux  ou  la  pure  doctrine  se  presche,  et  mesmes  la  ou  il  y  aura  Eglise,  il  y  a  beaucoup  de  contempteurs  de  Dieu,  gens  dissolus  et  profanes,  qui  seront  pour  insecter  le  reste,  si  Dieu  ne  le  conservoit  par  sa  vertu.  Les  autres  demeureront  tousiours  en  leur  brutalite.  Il  y  en  a  tant  auiourd'huy  qu'on  n'appercoit  pas  que  depuis  vingt  ou  vingt  deux  ans  ils  se  soyent  avancez  d'un  seul  pas  en  la  cognoissance  de  Dieu  :  ils  ne  scavent  que  c'est  ni  de  foy  ni  de  reverence,  non  plus  que  des  bestes.  Les  autres,  combien  qu'ils  ayent  assez  d'intelligence,  si  est-ce  qu'ils  perdent  courage  et  sont  la  du  tout  assopis,  et  ne  tienent  plus  conte  ni  de  Dieu  ni  de  sa  Parolle,  tellement  que  le  nombre  des  brebis  ec  vrays  agneaux  est  bien  petit.  Or  cependant  nous  voyons  comme  par  toute  l'Europe  le  diable  ha  la  vogue,  que  les  mensonges,  tromperies  et  illusions  sont  la  receues,  et  que  le  monde  en  est  tellement  ensorcele  qu'il  n'y  a  moyen  de  le  reduire.  On  voit  que  les  hommes  non  seulement  despitent  Dieu  et  le  blasphement  a  leur  escient,  mais  sont  tellement  enflammez  de  forcenerie  qu'il  semble  qu'ils  doyvent  arracher  le  soleil  du  ciel  et  luy  oster  sa  clarte.  Quand  donc  nous  voyons  cela  nous  avons