25:632  ques,  et  Primats,  qui  ne  se  soucient  que  de  chasser,  ou  d'yvrongner,  de  iouer  et  de  paillardes  voila  leur  mestier  ordinaire.  Et  pourquoy?  car  iamais  n'ont  pense,  que  l'honneur  qu'ils  usurpent  fust  conioint  a,  aucune  obligation.  Et  cela  n'a  point  este  seulement  en  l'Eglise,  mais  en  tous  estats.  Si  les  Princes  pensoyent  auiourd'huy  a  la  charge  qu'ils  ont,  assavoir  si  tout  le  monde  seroit  ainsi  trouble  de  guerres,  et  si  chacun  tascheroit  de  ravir  pour  augmenter  ses  bornes?  Car  il  n'y  a  celuy  qui  ait  a  gouverner  une  lieue  de  pays,  qui  ne  s'en  trouve  bien  empesche,  quand  il  regarde  a  l'office  et  au  devoir  qu'il  a  tant  a  Dieu  qu'aux  suiets.  Or  celuy  qui  a  deux  cens  lieues  de  pays  sous  luy,  se  voudroit  assuiettir  tout  le  monde.  Et  pourquoy?  car  il  n'est  point  question  de  ce  fardeau  duquel  parle  ici  Moyse  :  voire  comme  s'il  n'y  avoit  point  une  reigle  donnee  a,  tous  ceux  qui  ont  quelque  preeminence  et  authorite,  que  Dieu  leur  declare  et  prononce  par  la  bouche  de  Moyse  comme  par  son  heraut,  qu'ils  ne  sont  point  des  Idoles  pour  presider  seulement  en  pompe:  mais  qu'il  faut  qu'ils  soustiennent  la  charge  du  peuple,  laquelle  ne  peut  estre  sinon  une  servitude  honorable,  comme  desia  nous  avons  dit.  Cela  mesmes  s'estend  iusques  aux  personnes  privees.  Il  n'y  a  celuy  qui  ne  demande  d'acquerir  tousiours  de  nouveau,  et  quand  il  aura  plus  de  revenu  trois  fois  qu'il  ne  luy  en  faut  pour  son  mesnage,  il  n'est  question  que  d'attrapper,  et  de  conioindre  une  piece  a  l'autre:  car  nul  ne  regarde,  comment  est-ee  que  ie  m'acquitte  de  ce  que  Dieu  m'a  donne?  I'ay  du  bien  entre  mains,  i'ay  famille,  ie  me  devroye  occuper  a  instruire  ma  femme,  mes  enfans,  mes  serviteurs  en  la  crainte  de  Dieu,  ie  devroye  avoir  tousiours  l'oeil  pour  veiller  a  ce  qu'il  ne  se  fist  rien  en  la  maison,  ou  Dieu  soit  offense.  Quant  a  mon  bien,  ie  devroye  m'exercer  en  sorte  que  l'usage  en  fust  reigle  selon  la  volonte  de  Dieu  :  s'il  y  a  abondance,  que  ceux  qui  ont  faute  et  necessite,  soyent  substantez  par  moy.  Or  nul  ne  regarde  a  cela,  mais  ceux  qui  ont  du  bien,  sont  comme  gouffres  pour  engloutir  tout  ce  qu'ils  peuvent  serrer,  il  n'est  question  que  de  mettre  tout  sous  leurs  pattes,  que  nul  ne  sera  secouru  au  besoin:  et  puis  ce  leur  est  tout  un  moyennant  qu'ils  facent  leur  profit:  car  l'honneur  de  Dieu  ne  leur  est  pas  tant  recommande  qu'ils  ne  veulent  estre  enyvrez  en  ce  monde,  et  y  dominer  a  leur  plaisir.  Et  cependant  il  n'est  question  que  de  s'augmenter,  voire  et  ne  regardent  pas  qu'ils  ne  font  que  se  plonger  en  plus  grande  malediction  tousiours.  Notons  bien  donc  la  doctrine  qui  nous  est  ici  donnee  par  l'exemple  de  Moyse,  c'est  qu'un  chacun  de  nous  cognoisse  en  premier  lieu,  quand  il  plaist  a  Dieu  de  nous  mettre  du  bien  entre  mains,  ou  de  nous  eslever  en  quelque  estat,  qu'il  nous  oblige,  et  qu'il  y  a  un  lien  tant