47:63  63  IN  EVANGELIUM  IOANNIS  64  et  excelso,  ut  omnium  adspectui  pateat:  id  factum  est  evangelii  praedicatione.  Nam  quod  de  cruce  quidam  exponunt,  contextui  non  quadrat  et  alienum  est  ab  instituto.  Simplex  ergo  verborum  sensus  est,  quod  evangelii  promulgatione  instar  vexilli  erigendus  fuerit  Christus,  quo  intenderent  omnium  oculi,  sicut  praedixerat  Iesaias  (Ies.  2,  2).  Huius  exaltationis  typum  statuit  in  serpente  aeneo,  qui  a  Mose  erectus  fuit,  cuius  conspectus  salutare  remedium  iis  erat,  qui  letali  serpentum  morsu  vulnerati  erant.  Nota  est  historia  quae  habetur  Num.  21,  v.  9.  Porro  in  hunc  finem  hoc  loco  adducitur,  ut  se  doceat  Christus  evangelii  doctrina  constituendum  esse  ante  omnium  oculos,  ut  quicunque  ipsum  fide  intuiti  fuerint  salutem  percipiant.  Unde  colligendum  est  Christum  nobis  in  evangelio  clare  proponi,  ne  quis  de  obscuritate  queratur,  et  patefactionem  hanc  omnibus  esse  communem  et  suum  esse  fidei  adspectum,  quo  tanquam  praesentem  cernat:  quemadmodum  dicit  Paulus  ipsum  cum  cruce  sua  graphice  depingi,  quum  vere  praedicatur  (Galat.  3,  1).  Non  est  autem  similitudo  impropria  vel  longe  petita.  Sicut  externa  tantum  erat  serpentis  species,  intus  nihil  tabificum  aut  venenosum,  ita  formam  carnis  peccatricis  induit  Christus,  a  peccato  tamen  puram  et  vacuam,  quo  letale  in  nobis  peccati  vulnus  sanaret.  Neque  enim  frustra  Dominus  olim,  quum  a  serpentibus  vulnerati  essent  Iudaei,  tale  antidoti  genus  opposuit,  atque  hoc  ad  confirmationem  sermonis  a  Christo  habiti  valebat.  Nam  quum  instar  obscuri  et  abiecti  hominis  contemni  se  videret,  nihil  aptius  afferre  potuit  serpentis  exaltatione,  ac  si  diceret,  non  debere  videri  absurdum,  si  praeter  hominum  opinionem  ex  infimo  evehatur,  quia  id  in  serpentis  typo  iam  adumbratum  sub  lege  fuerit.  Quaeritur  nunc,  an  se  Christus  serpenti  comparet,  quia  sit  aliquid  simile,  an  vero  sacramentum  fuisse  significet,  quale  fuit  manna.  Tametsi  enim  manna  corporalis  erat  cibus  destinatus  ad  praesentem  usum,  simul  tamen  mysterium  spirituale  fuisse  testatur  Paulus  (1.  Cor.  10,  3).  Idem  ut  de  serpente  aeneo  sentiam,  tum  hic  locus  me  inducit,  tum  quod  in  posterum  servatus  fuit,  donec  populi  superstitione  in  idolum  conversus  esset.  Si  quis  aliter  iudicet  non  contendo.  16.  Sic  enim  Deus.  Primam  salutis  nostrae  causam  et  quasi  fontem  aperit  Christus,  idque  ne  qua  dubitatio  haereat.  Neque  enim  tranquilla  est  animis  nostris  statio  in  qua  quiescant,  donec  ad  gratuitum  Dei  amorem  ventum  est.  Ergo  sicuti  non  alibi  quam  in  Christo  tota  salutis  nostrae  materia  quaerenda  est,  ita  videndum  unde  nobis  Christus  fluxerit,  cur  nobis  oblatus  sit  servator.  Utrumque  hic  distincte  nobis  traditur,  quod  scilicet  fides  in  Christum  sit  omnibus  vivifica,  et  quod  ideo  vitam  attulerit  Christus,  quia  coelestis  pater  genus