45:63  63  HARMONIA  EVANGELICA.  64  ritus  instinctu  retentus  fuerit  eius  animus.  Scimus,  quam  impotens  sit  zelotypia,  et  quam  violenter  hominem  abripiat:  quare  etiamsi  nimis  praecipitem  impetum  continuisset  Ioseph,  mirabiliter  tamen  occursum  fuit  variis  periculis,  quae  instabant,  quum  soli  vertendi  consilium  cepit.  Idem  et  de  silentio  Mariae  iudico:  ut  demus,  pudore  fuisse  cohibitam  ne  marito  prodere  auderet,  se  gravidam  esse  ex  spiritu,  Dei  tamen  providentia  magis  quam  proprio  consilio  retenta  fuit:  nam  si  verbum  fecisset,  ut  res  erat  plus  quam  incredibilis,  putasset  Ioseph,  se  ludibrio  haberi.  Id  vero  omnium  risu  tanquam  fabulosum  exceptum  foret:  nec  vero  tantum  fuisset  momenti  divino  oraculo,  si  postea  sequutum  esset.  Ergo  passus  est  Dominus,  servum  suum  Ioseph  ignorantia  trahi  in  perversum  iudicium,  ut  sua  ipse  voce  eum  in  viam  reduceret.  Sciendum  vero  est,  magis  id  nostra  omnium  quam  privata  eius  causa  factum  esse:  cavere  enim  modis  omnibus  voluit  Deus,  ne  qua  sinistra  suspicio  in  oraculum  caderet.  Quum  angelus  aggreditur  Ioseph  totius  adhuc  negotii  inscium,  non  habent  improbi  quod  calumnientur,  quin  ad  Deum  audiendum  integer  accesserit.  Non  fuit  uxoris  blanditiis  pellectus,  non  obtestationibus  excussa  fuit  quam  conceperat  opinio,  non  humanis  rationibus  flexus  in  contrariam  partem:  sed,  quum  in  animo  eius  haereret  falsum  uxoris  crimen,  Deus  se  interposuit,  quo  magis  idoneus  nobis  esset  testis  ac  plus  autoritatis  haberet,  tanquam  ad  nos  e  coelo  demissus.  Videmus  ut  Deus  per  angelum  voluerit  docere  servum  suum  Ioseph,  quo  aliis  coelestis  esset  praeco,  non  autem  acceptum  vel  ab  uxore  vel  a  quoquam  mortalium  sermonem  narraret.  Quod  non  pluribus  statim  patefactum  fuit  mysterium,  haec  fuisse  videtur  ratio:  quia  incomparabilem  hunc  thesaurum  absconditum  latere,  solis  vero  Dei  filiis  patere  decebat.  Deinde  nihil  absurdi,  si  Dominus  suorum  fidem  et  obedientiam,  ut  plerumque  solitus  est,  probare  voluerit.  Certe  nisi  quis  maligne  Deo  credere,  seque  illi  dare  in  obsequium  detrectet,  testimoniis,  quibus  hoc  fidei  nostrae  caput  probatum  est,  abunde  contentus  erit.  Eadem  etiam  causa  factum  est,  ut  Mariam  nubere  Dominus  permitteret,  ut  sub  coniugii  velo  usque  ad  maturum  revelationis  tempus  coelestis  virginis  conceptio  lateret:  interea  celati  sunt  increduli,  ut  merebatur  eorum  ingratitudo  et  malitia.  20.  Haec  eo  cogitante.  Hic  perspicimus,  ut  Dominus  tempestive  et  in  ipso,  quod  aiunt,  articulo  suis  adesse  soleat.  Unde  etiam  colligimus,  dum  ad  nostras  curas  et  anxietates  dissimulat,  nos  tamen  ab  ipso  respici:  sed  ita  scilicet  se  occultat,  et  tacitus  quiescit,  donec,  habito  patientiae  nostrae  examine,  tempore  a  se  constituto  nos  iuvet.  Certe  quantumvis  lentum  ac  serum  putetur  eius  auxilium,  utile  tamen  est  ita  differri.  Quod  per  somnium  apparuit