42:63  63  SERMON  XXXIX.  64  ont  plus  ample  connoissance,  doivent  penser  que  Dieu  leur  ha  donne  une  telle  grace,  non  pas  a  fin  qu'ils  la  retiennent  enfermee  comme  en  un  coffre,  ou  qu'ils  soient  en  opinion  devant  les  hommes,  pour  dire,  voila  des  gens  scavans,  mais  c'est  a  fin  qu'ils  profitent  a  leurs  freres,  lesquels  ils  voient  estre  rudes  et  ignorans:  il  faut  donc  qu'un  chacun  desploie  les  graces  de  Dieu,  a  fin  qu'on  emploie  le  tout  a  l'edification  de  l'Eglise,  que  celuy  qui  aura  plus  receu,  soit  plus  oblige  envers  ses  prochains  que  les  autres:  et  c'est  une  chose  qui  est  pratiquee  auiourd'huy  bien  mal,  a  la  confusion  de  ceux  ausquels  Dieu  ha  donne  des  graces  pour  le  servir,  car  nous  voions  comme  ils  s'espargnent.  S'il  y  ha  iamais  eu  temps  ou  il  falust  plus  appliquer  son  estude  a  retirer  les  pauvres  errans  de  la  voie  de  perdition,  a  confermer  ceux  qui  sont  desia  au  droit  chemin,  c'est  maintenant,  et  toutesfois  combien  y  en  ha-il  qui  facent  cela  fidelement?  tant  y  ha  que  ce  n'est  pas  sans  cause  que  l'ange  dit  ici  a  Daniel,  En  ce  temps  la  les  prudens  donneront  instruction,  et  de  fait,  il  en  advint  ainsi,  car  quand  le  trouble  survint  d'Antioche,  et  que  ses  edits  tant  cruels  et  inhumains  vollerent  que  sur  peine  de  la  vie,  nul  ne  retinst  les  livres  de  la  loy,  ne  des  prophetes,  que  sur  peine  de  la  vie,  nul  ne  sacrifiast  au  temple,  que  sur  peine  de  la  vie  nul  ne  circoncist  ses  enfans,  que  sur  peine  de  la  vie  on  n'observast  rien  de  tout  ce  qui  estoit  commande  en  la  loy,  mais  qu'on  se  polluast  aux  idolatries  et  abominations  des  payens:  quand  cela  fut,  o  il  est  certain  qu'il  y  avoit  beaucoup  de  pauvres  simples  et  idiots  qui  se  fussent  iettes  a  l'abandon  pour  renoncer  Dieu  et  la  loy,  sinon  que  ceux  qui  estoient  mieux  enseignes,  et  confermes  en  la  doctrine  leur  eussent  fait  ces  remonstrances,  et  exhortations,  comment?  Et  des  nostre  enfance  nous  avons  eu  la  marque  de  Dieu,  nous  avons  este  circoncis,  pour  avoir  tesmoignage  qu'il  nous  tenoit  pour  son  peuple,  et  maintenant  luy  fauserons-nous  la  foy,  que  nous  luy  avons  donnee?  N'ha-il  point  fait  son  alliance  avec  nous,  laquelle  il  veut  garder  de  sa  part?  Et  aussi  il  demande  que  nous  luy  soions  fideles  de  nostre  coste:  retenons  donc  cette  doctrine,  combien  que  maintenant  il  ne  soit  point  licite  de  la  prescher  en  liberte,  qu'elle  ait  racine  en  nos  coeurs,  et  que  nous  monstrions  que  c'est  la  verite  de  Dieu  permanente,  qui  ne  se  peut  iamais  effacer.  Voila  donc  comme  les  prudens,  c'est  a  dire,  ceux  ausquels  Dieu  avoit  fait  plus  de  graces  incitoient  les  pauvres  idiots,  et  les  instruisoient,  et  ceux-la  aussi  souffroient  d'estre  enseignes.  Nous  voions  donc  en  somme,  qu'ici  l'ange  ha  voulu  monstrer  quel  est  l'office  de  tous  fideles,  quand  Dieu  permet  qu'on  les  afflige,  et  qu'ils  endurent  des  persecutions,  c'est  a  scavoir,  que  chacun