25:629  629  SUR  LE  DEUTER.  CHAP.  I.  630  s'assuiettir  au  conseil  de  Iethro  son  beau-pere  lequel  n'avoit  iamais  cognu  que  c'estoit  de  la  vraye  Religion,  mais  en  avoit  seulement  gouste  un  petit  en  ombrage  :  que  sera-ce  de  nous  qui  ne  sommes  point  parvenus  a  une  telle  gloire  que  Moyse?  Ainsi  aprenons,  encores  que  Dieu  nous  ait  eslargi  plus  amplement  de  son  Esprit,  que  ce  n'est  pas  que  nous  devons  reietter  l'advis  et  conseil  de  ceux  qui  sont  moindres  que  nous.  Car  voila  comme  Dieu  veut  que  nous  soyons  unis  et  conioint  les  uns  avec  les  autres  avec  vraye  liaison:  c'est  que  les  grands  condescendent  aux  plus  petis,  et  qu'ils  s'accordent  tous.  Cependent,  comme  il  a  este  declare  combien  que  Iethro  ait  este  l'instrument  pour  advertir  Moyse,  toutesfois  que  cela  doit  estre  attribue  a  Dieu,  et  qu'il  a  regarde  ce  qui  estoit  propre  et  utile  pour  son  peuple  pour  ne  luy  deffaillir  en  rien.  Et  c'est  a  ceste  intention  que  Moyse  parle.  Venons  maintenant  aux  mots  qui  sont  ici  contenus.  Il  dit  en  premier  lieu  qu'il  ne  les  peut  plus  porter  luy  seul,  a  cause  qu'ils  estoyent  grandement  augmentee  :  car  vous  estes,  dit-il,  par  dessus  les  estoilles  du  ciel,  comme  nous  savons  qu'ils  estoyent  plus  de  sept  cent  mille  personnes.  Puis  qu'ainsi  est  donc,  ie  ne  puis  plus  porter  vos  charges,  et  vos  fascheries,  et  vos  proces,  dit-il:  ainsi  il  reste  que  vous  eslisiez  gens  avec  moy,  qui  s'employent  a  cela,  gens  sages  et  entendus,  et  bien  approuvez.  En  premier  lieu  quand  Moyse  proteste  qu'il  ne  sauroit  plus  porter  la  charge  du  peuple,  en  cela  il  nous  monstre  que  ceux  qui  sont  eslevez  en  quelque  degre  d'honneur,  ou  en  quelque  dignite,  ne  doyvent  pas  estre  comme  idoles  sans  rien  faire:  mais  c'est  a  ceste  condition  qu'ils  travaillent,  et  que  mesmes  ils  servent  au  bien  commun  du  peuple,  comme  si  Dieu  leur  avoit  mis  le  fardeau  sur  les  espaulles,  de  soustenir  l'estat  commun.  Et  c'est  une  doctrine  qui  est  bien  a  observer:  car  nous  voyons  comme  les  hommes  sont  addonnez  a  l'ambition,  qu'un  chacun  ne  demande  qu'a  estre  prise  et  honore,  et  tous  aspirent  a  grandeur.  Et  pourquoy?  car  nous  ne  cognoissons  point  quand  Dieu  nous  esleve,  que  c'est  afin  que  nous  representions  sa  personne  au  monde.  Or  cependant  cela  ne  peut  estre  sans  difficulte.  Selon  donc  qu'une  charge  est  plus  honorable,  elle  est  aussi  de  plus  grand  travail,  et  plus  penible:  mais  d'autant  que  les  hommes  imaginent  un  honneur  oisif,  voila  qui  les  transporte  en  ceste  folle  cupidite,  ou  plustost  enragee,  qu'ils  ne  demandent  sinon  d'avoir  la  vogue,  et  d'estre  bien  hauts,  voire  pour  se  rompre  le  col  le  plus  souvent.  Or  d'autre  part  nous  devons  bien  noter  ce  que  Moyse  dit,  qu'il  ne  peut  porter  une  si  grande  charge:  car  il  declare  qu'il  cognoist  son  infirmite,  ou  pour  le  moins  il  la  monstre  telle,  qu'il  faut  qu'il  chemine  en  mediocrite.  Voila  donc  la  seconde  consideration  que  nous  devons  avoir