25:628  aussi  en  toute  integrite.  C'est  donc  autant  comme  si  Moyse  disoit  :  Regardez  combien  vous  estes  obligez  a  vostre  Dieu:  car  en  toutes  sortes  ii  vous  a  bien  prouveus  :  il  a  eu  tousiours  pitie  de  vous,  et  a  procure  vostre  salut  par  tous  moyens.  Et  de  faict,  la  memoire  des  graces  de  Dieu  nous  doit  tousiours  inciter  a>  le  servir  tant  mieux  quand  nous  voyons  qu'il  ne  nous  a  en  rien  defailli,  n'est-ce  pas  raison  que  nous  soyons  d'autant  plus  affectionnez  a  nous  dedier  du  tout  a  son  obeissance?  Car  il  monstre  combien  il  nous  tient  chers,  quel  amour  il  nous  porte,  et  quel  soin  il  a  de  nostre  salut,  quand  il  le  procure  en  telle  sorte.  Or  cependant  par  especial  nous  avons  ici  a  noter  que,  quand  Dieu  ordonne  une  bonne  police  entre  nous,  et  gens  qui  nous  maintiennent,  que  c'est  un  tesmoignage  singulier  de  sa  bonte,  et  de  son  amour  envers  nous.  Vray  est  que  ce  qui  est  ici  recite  par  Moyse,  procede  du  conseil  de  Iethro  son  beau-pere,  comme  il  le  traitte  au  dixhuitieme  d'Exode.  Et  combien  que  Iethro  fust  un  homme  payen,  tant  y  a  que  Dieu  s'est  servi  de  luy  en  cest  endroit.  Et  ainsi  voyons  nous  que  Dieu  applique  a  nostre  usage  toutes  choses,  toutes  creatures.  Qui  eust  attendu  qu'un  homme  qui  n'avoit  nulle  accointance  au  peuple  d'Israel,  sinon  que  Moyse  avoit  prins  femme  en  sa  maison,  aue  celuy-la  vinst,  et  qu'il  donnast  un  tel  conseil?  Mais  voila  comme  Dieu  applique  a  l'utilite  de  son  peuple  toutes  creatures,  ainsi  que  desia  i'ay  touche.  Au  reste,  nous  avons  a��  observer  l'humilite  de  Moyse,  d'autant  qu'il  n'a  point  mesprise  l'advertissement  qui  luy  a  este  donne  par  celuy  qui  n'estoit  pas  tant  excellent  que  luy  a  beaucoup  pres.  Moyse  pouvoit  repliquer:  Et  qui  est  cest  homme?  Car  ie  suis  choisi  de  Dieu  pour  gouverner  son  Eglise,  et  pour  en  estre  la  chef,  i'ay  publie  sa  Loy  en  son  nom,  i'ay  represente  sa  maieste,  qu'il  m'a  donne  mesme  un  signe  visible  en  ma  face,  comme  si  i'estoye  plustost  un  Ange  descendu  du  ciel  qu'un  homme  terrien.  I'ai  este  separe  de  la  compagnie  des  hommes  mortels  par  l'espace  de  quarante  iours,  comme  si  desia  Dieu  m'eust  glorifie:  et  maintenant  qu'un  homme  vulgaire  s'advance  pour  m'instruire  ?  Moyse  donc  pouvoit  mettre  ces  choses  en  avant,  mais  tant  y  a  qu'il  s'assuiettit  a  raison.  Pourquoy?  car  il  cognoissoit  que  Dieu  distribue  de  ses  graces  comme  il  luy  plaist,  tellement  que  les  petits  quelque  fois  peuvent  servir  aux  plus  grands,  et  aux  plus  excellens.  Et  en  cela  Dieu  veut  esprouver  la  sobriete  et  modestie  de  ceux  qu'il  a  eslevez  en  degre  souverain,  quand  ils  ne  s'oublient  point,  mais  qu'ils  sont  tousiours  dociles  et  si  on  leur  apporte  quelque  chose  de  meilleur  qu'ils  n'ont  pense,  s'ils  le  recoyvent  volontiers,  et  s'abaissent,  voila  un  vray  examen  de  leur  obeissance.  Puis  que  Moyse  qui  a  este  le  principal  entre  les  Prophetes  anciens,  a  bien  voulu