6:627  DE  VITANDIS  SUPERSTITIONIBUS.  PETRI  MARTYRIS  CONSILIUM.  [pag.  110]  Quae  a  dominis  Philippo  et  Bucero  scripta  sunt,  mihi  quoque  probantur:  istaque  solummodo  adscribo,  ut  potius  magis  explicem,  quam  ut  illorum  consilio  adiiciam.  In  primis,  qui  baptismum  infantibus  suis  in  ecclesiis  papisticis  petunt,  aut  in  illis  precibus  intersunt  vespertinis  et  matutinis,  quum  ista  ibi  non  perficiantur  sine  mortuorum  invocatione,  aut  suffragiis  pro  defunctis:  eorum  partes  sunt,  ita  amplecti  in  istis  Dei  et  Christi  instituta,  ut  vitia  ipsi  detestentur,  non  modo  secum  in  animo,  sed  pro  opportunitate  oblata,  verbis  ea  patefaciant,  idque  potissimum  eis,  quos  ut  infirmos  vident  se  posse  offendere  suis  illis  actionibus.  Ut  vero  missae  intersint,  et  profanatissimae  coenae  papistarum,  non  debent  adduci  exemplo  sanctorum  Iudaeorum  ante  Christi  adventum,  qui  ritibus  et  caeremoniis  Hierosolymis  intererant,  quum  nostra  et  illorum  non  sit  omnino  eadem  ratio.  Illis  enim  tunc  iusserat  Dominus,  non  solum  ut  illa  facerent,  sed  ut  in  anno  ter  apparerent  coram  Domino:  neque  alibi  quam  Hierosolymis  sacrificare  licuit.