35:626  veu  qu'elles  provoquent  ainsi  l'ire  de  Dieu  contre  nous.  Voyla  donc  pourquoy  il  a  este  requis  que  toute  la  correction  de  nostre  paix  fust  sur  Iesus  Christ,  laquelle  fust  pour  nous  faire  trouver  grace  devant  Dieu  son  Pere:  c'est  a  dire  pour  nous  faire  trouver  appointement  devant  luy:  en  sorte  qu'auiourd'huy  nous  avons  hardiesse  et  liberte  d'invoquer  Dieu  comme  nostre  Pere,  combien  qu'a  bon  droict,  il  nous  soit  ennemi,  et  nous  ait  en  detestation  selon  nostre  nature.  Nous  voyons  donc  maintenant  quelle  est  l'intention  du  Prophete  quand  il  dit  que  nostre  Seigneur  Iesus  Christ  a  este  afflige  de  la  main  de  Dieu,  qu'il  a  este  desfigure,  qu'un  chacun  s'est  destourne  de  luy,  qu'on  n'a  point  daigne  le  regarder,  pource  qu'il  estoit  ainsi  deforme.  Il  adiouste,  Voire,  mais  c'est  d'autant  que  Dieu  est  enflamme  en  son  ire  contre  nous,  et  qu'il  est  arme  pour  nous  confondre  et  abysmer,  iusques  a  ce  que  l'appointement  soit  faict.  Et  quel  en  est  le  moyen?  Dieu  veut  bien  nous  remettre  nos  fautes  par  sa  bonte  gratuite,  mais  tant  y  a  que  le  pris  de  nostre  redemption  a  este  en  la  personne  de  son  Fils  unique.  Or  yci  nous  avons  a  noter,  que  d'autant  que  nostre  Seigneur  Iesus  a  souffert  condamnation,  nous  sommes  delivrez  et  absous,  et  que  nos  fautes  sont  ensevelies  pour  ne  point  venir  en  conte  devant  Dieu.  Quand  nous  parlons  de  la  remission  des  pechez,  ce  n'est  pas  que  Dieu  nous  quitte,  comme  s'il  estoit  paye  et  contente  de  nous:  mais  il  use  de  sa  pure  liberalite.  Et  combien  que  nous  soyons  coulpables  devant  luy,  il  oublie  tout  cela,  et  nous  recoit  a  merci,  d'autant  qu'il  iette  nos  pechez  comme  au  profond  de  la  mer,  ainsi  que  dit  le  Prophete.  Or  cependant  nous  avons  aussi  a  noter  que  ceste  remission  n'a  pas  este  gratuite  quant  a  la  personne  de  nostre  Seigneur  Iesus  Christ,  car  elle  lui  a  couste  bien  cher.  Si  nous  estimons  que  c'a  este  de  ceste  mort  tant  dure,  tant  cruelle,  et  ignominieuse  qu'il  a  soufferte,  et  puis  de  tant  d'angoisses  qu'il  a  endurees  en  son  ame,  quand  il  a  este  appele  devant  le  siege  Iudicial  de  Dieu  son  Pere  pour  soustenir  nostre  condamnation:  si  nous  pensons  bien  a  tout  cela,  nous  trouverons  que  nostre  Seigneur  Iesus  Christ  a  fait  un  payement  admirable  pour  nous  acquitter  de  nos  fautes.  Et  voyla  comme  auiourd'huy  nous  en  sommes  delivrez.  Et  c'est  une  chose  que  nous  devons  bien  noter:  car  le  diable  a  tousiours  tasche  d'obscurcir  ceste  doctrine,  d'autant  que  c'est  le  principal  article  de  nostre  salut.  Dieu  des  le  commencement  du  monde  a  voulu  qu'on  luy  offrist  sacrifices  en  demandant  pardon  des  pechez.  Et  pourquoy  cela?  C'est  pour  declarer  que  les  hommes  ne  le  pouvoyent  pas  esperer  de  luy,  sinon  par  le  moyen  du  sacrifice  et  effusion  de  sang.  Tous  donc  ont  proteste  en  40