9:622  ont  iournellement  a  combatre  contre  leurs  infirmites.  Mesmes  S.  Paul  se  voyant  prochain  de  la  mort,  et  s'estant  desia  appreste  pour  estre  sacrifie,  adiouste  qu'il  n'est  pas  encores  venu  au  but  ou  il  tendoit:  mais  qu'il  s'efforce  pour  y  parvenir  (2.  Tim.  4,  6).  Ce  n'est  pas  donc  a  dire,  quand  Iesus  Christ  regne  en  nous,  et  que  son  esprit  nous  gouverne,  qu'il  n'y  ait  plus  que  toute  purete  et  perfection.  Ce  rustre  a  l'opposite,  sous  ombre  que  tous  Chrestiens  doivent  estre  reformes  en  sainctete  de  vie,  pretend  que  nul  ne  peut  et  ne  doit  confesser  [page  66]  Iesus  Christ,  iusqu'a  ce  qu'il  soit  du  tout  sans  tache  ne  macule.  Et  qu'emporte  cela?  c'est  que  cependant  que  nous  vivons  au  monde,  nous  ne  devons  faire  nulle  recognoissance  a  Dieu,  veu  que  nous  sommes  imparfaicts.  Qu'il  entrelace  tant  qu'il  voudra  de  belles  sentences  pour  tromper  les  simples:  Que  la  foy  n'est  point  d'avoir  ouy  quelques  sermons,  d'avoir  creu  a  l'Evangile:  mais  quand  il  revient  a  ce  point,  que  nul  n'est  Chrestien  s'il  n'est  parfaict,  et  que  nul  ne  peut  confesser  Iesus  Christ  sinon  celuy  qui  n'a  plus  de  vice  en  soy,  c'est  renvoyer  la  confession  de  l'Evangile  aux  Anges  et  aux  trespasses.  Nous  disons  bien  pour  confesser  Iesus  Christ  de  bouche,  qu'il  faut  avoir  racine  vive  de  foy  en  son  coeur:  mais  quand  ce  gaudisseur  dit  qu'il  n'est  iamais  saison  de  confesser  Iesus  Christ  iusqu'a  ce  qu'on  soit  pur  et  net  de  tout  vice,  c'est  donner  pleinement  licence  a  tous  hommes  qui  conversent  en  terre,  de  renoncer  et  desavouer  Iesus  Christ.  Or  ie  demande  a  qui  Iesus  Christ  parloit  en  disant,  Qui  aura  honte  de  moy  devant  les  hommes,  ie  le  desavoueray  devant  Dieu  mon  pere  (Marc.  8,  38)?  Certes  les  meilleurs  et  plus  excellens  estoyent  les  trois  ausquels  il  dit  puis  apres  :  L'esprit  est  prompt,  mais  la  chair  est  debile  (Matth.  26,  41).  Et  de  faict3  S.  Paul  estoit  encores  plus  avance  qu'eux,  quand  il  gemit  et  se  lamente  qu'il  ne  fait  pas  le  bien  qu'il  voudroit,  mais  le  mal  qu'il  hayt  (Rom.  7,  19).  Cependant  pour  esblouir  les  yeux  des  ignorans,  il  extravague,  et  allegue  que  ce  zele  qu'il  appelle  fol,  a  mis  en  desespoir  Francisco  Spiera.  Mais  s'il  sait  ce  que  i'en  ay  escrit,  il  est  bien  malin  de  le  dissimuler.  S'il  ne  le  sait  point,  qu'il  se  deporte  [page  67]  d'orenavant  de  habiller  de  choses  incognues.  On  peut  voir  et  iuger  que  c'est  homme  la  estoit  fort  plein  d'ambition  et  outrecuidance.  Or  pour  se  fair  valoir  il  n'estoit  que  trop  hardi:  quand  il  est  menace,  il  renonce  tout  pour  sauver  sa  vie.  Ce  pendant  pour  couvrir  sa  honte  il  se  iette  en  des  speculations  erronees,  qu'il  est  predestine  a  estre  damne.  Si  un  homme  affectant  de  se  monstrer,  fait  pour  quelque  temps  du  grand  zelateur,  et  puis  quand  ce  vient  au  combat  il  se  retire  et  est  vaincu:  s'ensuitil  qu'un  homme  craignant  Dieu  ne  doyve  faire  protestation  de  sa  foy  en  simplicite  iusqu'a  la  mort?