35:622  nous  avons  guarison.  6.  Nous  avons  tous  erre  comme  brebis,  chacun  a  suivi  sa  voye:  et  le  Seigneur  a  fait  venir  sur  luy  toutes  nos  iniquitez.  Quand  nous  contemplons  les  oeuvres  de  Dieu  en  tout  le  monde,  il  nous  est  dit  qu'il  doit  estre  loue  selon  sa  hautesse  et  grandeur:  mais  quand  nous  venons  a  la  personne  de  nostre  Seigneur  Iesus  Christ,  il  faut  que  nous  apprenions  de  glorifier  Dieu  selon  qu'il  s'est  abbaisse.  Voyci  donc  double  facon  de  louer  Dieu  :  l'une  c'est  que  pource  qu'il  nous  monstre  sa  bonte,  iustice  et  vertu  infinie  en  tout  ce  qu'il  a  cree  et  fait,  et  en  ce  qu'il  ordonne  et  dispose  tout,  il  faut  aussi  qu'il  soit  exalte  de  nous:  non  pas  que  nous  luy  puissions  donner  quelque  grandeur:  mais  l'Escriture  parle  ainsi,  afin  que  les  hommes  apprenent  de  lever  leurs  esprits  en  haut,  et  par  dessus  tout  le  monde,  quand  ils  veulent  glorifier  Dieu  selon  qu'il  le  merite.  La  seconde  facon  est,  que  d'autant  que  nostre  Seigneur  Iesus  Christ,  auquel  habite  toute  plenitude  de  Divinite,  non  seulement  s'est  fait  petit  pour  nostre  salut,  mais  a  voulu  du  tout  estre  aneanti,  mesmes  n'a  pas  refuse  de  souffrir  les  angoisses  de  la  mort,  comme  s'il  entroit  en  enfers:  en  cela  Dieu  merite  d'estre  glorifie  plus  qu'en  ceste  grandeur  qui  apparoist  par  tout  le  monde.  Et  de  cela  il  en  fut  hier  desia  touche:  mais  d'autant  que  le  Prophete  continue  son  propos,  il  nous  faut  tousiours  avoir  ce  but,  qu'au  lieu  que  les  incredules  sont  estonnez,  voyans  que  Iesus  Christ  a  este  ainsi  afflige  de  la  main  de  Dieu  son  Pere,  et  prennent  occasion  de  scandale  pour  s'eslongner  de  luy,  nous  devons  tant  plus  estre  incitez  a  le  chercher,  et  cela  nous  doit  du  tout  ravir  en  son  amour,  puis  qu'il  ne  s'est  point  espargne,  mais  a  voulu  soustenir  toutes  nos  charges,  afin  que  nous  en  fussions  soulagez.  Quand  donc  nous  voyons  que  nostre  Seigneur  Iesus  Christ  a  fait  un  tel  eschange  pour  nous,  et  a  voulu  faire  un  payement  entier  de  toutes  nos  dettes,  afin  que  nous  en  fussions  acquittez,  qu'il  a  voulu  estre  condamne  en  nostre  nom,  et  comme  en  nostre  personne,  afin  que  nous  en  fussions  absous,  voyla  qui  nous  doit  attirer  a  luy,  voire  enflammer  du  tout,  a  ce  que  nous  y  ayons  nostre  repos.  Or  notamment  il  est  dit  qu'il  a  este  afflige  de  la  main  de  Dieu,  mais  c'a  este  pour  nos  iniquitez.  Car  si  nous  n'avons  esgard  au  iugement  de  Dieu,  la  mort  et  passion  de  nostre  Seigneur  Iesus  Christ  sera  comme  inutile,  et  nous  n'en  pourrons  recevoir  aucun  fruit.  Car  le  principal  est  que  nous  soyons  appointez  avec  nostre  Dieu,  lequel  est  nostre  ennemi  iusques  a  ce  que  nos  fautes  soyent  ensevelies,  d'autant  qu'il  ne  peut  aimer  l'iniquite,  luy  qui  est  la  fontaine  de  iustice.  Ainsi  il  faut  qu'il  soit  nostre  iuge  cependant  qu'il  nous  impute  nos  pechez,  et