23:622  titudo,  ut  futurae  redemptionis  testis  sit  ac  sponsor,  nisi  quod  a  patre  sic  edoctus  fuerat?  Neque  enim  Deum  ei  apparuisse  legimus,  vel  oraculum  per  angelos  e  coelo  fuisse  allatum:  sed  quia  certo  persuasus  erat  Iacob  doctorem  et  prophetam  divinitus  fuisse  creatum,  qui  foedus  salutis  apud  se  depositum  ad  filios  transmitteret,  non  minus  secure  in  eius  testimonium  recumbit  quam  si  oblata  fuisset  aliqua  visio,  vel  angelos  e  coelo  delapsos  vidisset.  Nisi  enim  verbi  auditus  ad  fidem  nobis  sufficiat,  indigni  sumus  quibuscum  agat  Deus,  quem  fraudamus  suo  honore.  Non  quod  fides  ab  hominibus  pendeat,  sed  quia  per  os  hominum  loquentem  Deum  audit,  et  externa  eorum  voce  patitur  altius  se  deduci.  Deus  enim  quod  per  homines  pronunciat,  spiritu  suo  obsignat  in  cordibus  nostris.  Ita  neque  alibi  quam  in  ipso  fundata  est  fides:  et  tamen  hominum  praedicationi  non  deest  suum  pondus  et  reverentia.  Ita  compescitur  proterva  eorum  curiositas  qui  visionibus  inhiantes  ordinarium  ecclesiae  ministerium  contemnunt,  ac  si  absurdum  foret:  Deum,  qui  olim  patribus  e  coelo  se  ostendit,  vocem  e  terra  emittere.  Atqui  si  reputarent  quam  magnifice  in  filii  unigeniti  persona  semel  ad  nos  descenderit,  non  ita  improbe  appeterent  coelum  quotidie  sibi  aperiri.  Ut  tamen  hoc  taceam,  quum  videant  Ioseph,  qui  patribus  hac  in  re  inferior  erat  quod  nullius  oraculi  particeps,  pietatis  doctrina  ab  ipsis  imbutus  fuerat,  pari  fide  cum  illis  certare,  nimis  ingrati  sunt  ac  maligni  si  huius  gratiae  societatem  fastidiant.  25.  Visitando  visitabit  Deus  vos.  His  verbis  innuit  quasi  oblivione  sepultos  fore,  quamdiu  manebunt  in  Aegypto.  Et  certe  perinde  fuit  illud  exsilium  ac  si  Deus  tergum  illis  ad  tempus  obverteret.  Ioseph  tamen  in  eum  mentis  oculos  intendere  non  desinit:  sicuti  habetur  apud  prophetam,  exspectabo  Dominum,  qui  abscondit  faciem  suam  a  domo  Iacob  (Isa.  8,  17).  Hic  etiam  locus  clare  docet  quorsum  spectaverit  tam  anxia  sepulcri  electio,  nempe  ut  redemptionis  sigillum  foret.  Postquam  enim  fidelem  esse  Deum  asseruit,  qui  praestabit  suo  tempore  quod  pollicitus  est,  continuo  post  fratres  suos  adiurat,  ut  ossa  sua  transferant.  Illae  utiles  erant  reliquiae,  quarum  aspectus  clare  personabat,  hominum  morte  minime  exstinctum  esse  aeternum  Dei  foedus,  in  quo  Ioseph  tuto  quiescere  iubet  posteros.  Nam  iusiurandum  Dei  adducere  satis  habet,  ut  de  suo  exitu  nihil  dubitent.