23:621  621  COMMENTARIUS  IN  GENESIN.  622  aulicis  opibus,  quia  sibi  nihil  melius  esse  ducebat  quam  vilescere,  ne  eum  terrena  dignitas  a  regno  Dei  separaret.  Spreverat  ante  illecebras  omnes  quae  eius  mentem  occupare  possent  in  Aegypto:  nunc  ulterius  progredi  necesse  habet,  ut  deposito  honore  ad  ignobilem  statum  descendat,  filiosque  suos  a  spe  successionis  ablactet.  Scimus  quam  anxie  laborent  alii,  tum  ne  ipsi  minuantur,  tum  ut  integram  fortunam  posteris  relinquant:  atqui  Ioseph  per  annos  sexaginta  huc  tantum  omnia  studia  impendit  quomodo  se  et  suos  in  ordinem  cogeret,  ne  sua  eos  magnitudo  a  tenui  grege  Domini  arceret.  Denique  serpentes  imitatus  est,  qui  exuvias  suas  abiiciunt,  ut  vetustate  exuti,  novum  vigorem  colligant.  Vidit  abnepotes  ex  sua  stirpe:  cur  non  una  cum  liberis  crescit  etiam  sollicitudo  ut  illis  prospiciat?  Verum  nulla  illi  vel  nobilitas  vel  opulentia  tanti  est  quin  malit  pastoritiae  vitae  addictos  contemni  ab  Aepyptiis,  ac  censeri  in  familia  Israel.  Caeterum  in  numerosa  sobole,  vivo  adhuc  et  superstiti  Dominus  gustum  aliquem  suae  benedictionis  praebuit,  unde  spem  liberationis  conciperet.  Nam  inter  tot  tentationes  operae  pretium  fuit  quibusdam  subsidiis  animari  et  fulciri,  ne  succumberet.  24.  Et  dixit  Ioseph  fratribus  suis.  Primusne  an  ultimus  fratrum  mortuus  fuerit  Ioseph,  an  pars  aliqua  supervixerit,  incertum  est.  Hic  quidem  Moses  sub  fratrum  nomine  non  solos  germanos,  sed  cognatos  alios  complectitur.  Quosdam  vero  ex  singulis  familiis  primarios  fuisse  eius  iussu  vocatos  existimo,  a  quibus  tota  gens  certior  deinde  fieret.  Quanquam  autem  alios  quoque  patriarchas  idem  mandasse  credibile  est,  quia  omnium  ossa  pariter  in  terram  Chanaan  delata  sunt:  specialis  tamen  unius  Ioseph  fit  mentio  ob  duas  causas.  Nam  quum  propter  summam  autoritatem  coniecti  essent  in  eum  omnium  oculi,  merito  debuit  illis  praeire,  et  sollicite  cavere  ne  cui  remoram  iniiceret  dignitatis  suae  splendor.  Secundo,  magnopere  ad  exemplum  interfuit,  cognosci  a  toto  populo,  eum  qui  regno  Aegypti  secundus  praeerat,  posthabito  tanto  honore,  gradu  suo  fuisse  contentum,  ut  tantum  nudae  promissionis  haeres  foret.  Ego  moriar.  Perinde  valet  loquutio  ac  si  iuberet  fratres  suos  bene  sperare  se  mortuo,  quia  immortalis  sit  Dei  veritas:  nam  eos  pendere  non  vult  a  sua  vel  alterius  vita,  ut  Deo  ullum  terminum  praescribant,  sed  patienter  quiescere,  donec  opportunum  adveniat  tempus.  Unde  autem  haec  tanta  illi  cer-