8:620  hanc  aetatem  ex  Adamo  et  lege  probari:  quia  sicuti  Adam  tricesimo  anno  natus  est,  sic  eadem  aetate  renasci  nos  debere.  Nimis  certe  pueriliter  de  virili  aetate,  ne  dicam  de  mysterio  tam  sublimi  nugatur.  Cur  tempus  illud  Christus  exspectaverit,  satis  notum  est.  Nam  baptismi  institutio  nonnisi  ab  Iohannis  praedicatione  coeperat.  Et  vero  absurdum  fuisset  doctrinae  praeire,  cuius  appendix  erat  et  sigillum.  Triginta  annis  Christus  quasi  privatus  homo  delituit.  Ad  obeundam  functionem  suam  emergens  baptismo  se  initiat.  An  legem  aliis  praescribit,  quorum  longe  dissimilis  est  ratio?  [pag.  226]  Imo  ne  a  doctoris  quidem  officio  arcere  voluit  iuniores:  tantum  abest  ut  viam  illis  ad  baptismum  praecluserit.  Quoto  enim  vitae  anno  ascitum  fuisse  Timotheum  dicemus  ad  munus  docendi,  cui  satis  longo  post  tempore  praecipit  Paulus  ut  suam  iuventutem  a  contemptu  asserat?  Duplex  affertur  a  Serveto  solutio,  quod  quum  ab  initio  conversionis  suae  probatus  esset  omnium  testimonio,  colligere  liceat  annum  tricesimum  excessisse.  Quomodo  igitur  eum  sui  non  pudet?  Ante  annum  vicesimum  quartum  libro  edito  se  pro  unico  orbis  propheta  iactavit.  Nunc  probari  quempiam  posse  negat,  ut  inter  discipulos  censeatur,  nisi  qui  annis  triginta  sit  superior.  Sed  cur  octodecim  annorum  probari  non  posset,  qui  a  puero  sacras  literas  didicerat,  et  fidem  propemodum  cum  lacte  imbiberat  a  matre  sua  et  avia  Loide?  Puer  in  fide  et  timore  Domini  educatus  erat  Timotheus,  vita  eius  caste  et  honeste  composita  fuerat:  nullam  tamen  pietatis,  vel  honestae  vitae  laudem,  autore  Serveto,  ante  annos  triginta  consequi  potuit.  Non  minus  decennio  post  Timothei  baptismum  praeterierat,  quum  Paulus  eum  admonet  ut  sibi  a  concupiscentiis  iuvenilibus  caveat.  Facturumne  id  fuisse  putamus,  nisi  adhuc  a  fervore  aetatis  vidisset  esse  periculum?  Nec  vero  hic  vel  libido  venerea,  vel  aliae  carnis  lasciviae  notantur  in  homine  abstemio  et  plus  satis  temperato,  vel  potius  austero,  ut  Paulus  ad  bibendum  vinum  hortari  eum  cogatur.  Quid  igitur?  Certe  hic  simplex  est  verborum  sensus,  ut  ingenii  calorem,  qui  in  iuvenibus  ut  plurimum  ebullit,  gravitate  temperet.  Atqui  excipit  Servetus,  puerum  vocari  Iosue  post  annum  quadragesimum,  [pag.  227]  sicuti  et  Ptoboam.  Primo,  hoc  nihil  ad  Timotheum,  cuius  iuventus  non  ex  solo  nomine,  sed  ex  certis  circumstantiis  probatur.  Deinde  Servetus  audacem  inscitiam  ubique  prodit.  DHirD  vocant  Hebraei  robustos  iuvenes,  aut  viros,  quasi  selectos  vel  egregios  dicas:  hic  bonus  Rabbinus,  neglecto  omni  delectu,  vocem  illam  in  puerum  convertit.  Secunda  solutio  est,  in  consequentiam  non  trahi  Timothei  exemplum,  de  quo  prophetia  praecesserat.  Quid  si  ex  opposito  contendam,  ex  Christi  quoque  exemplo  legem  perverse  statui,  quando  unigeniti  filii  Dei  separata  a  nobis  omnibus