5:620  Et  qu'ilz  ne  soyent  point  ordonnez  devant  que  d'estre  esprouvez:  ains  qu'il  y  ayt  quelques  gens  scavans  et  graves,  auxquels  soit  donnee  charge  en  chascun  diocese  d'examiner,  et  qu'iceux  ne  receoyvent  personne  s'il  n'apporte  tesmoignage  de  sa  vocation  a  un  certain  ministere,  et  de  ses  meurs,  puis  qu'ilz  esprouvent  sa  doctrine  touchant  les  principaux  poinctz  necessaires  a  l'Eglise.  S'ilz  en  [fol.  129]  trouvent  aucuns  du  tout  ignorans,  qu'ilz  empeschent  que  telz  ne  soyent  ordonnez,  advertissans  les  collateurs,  ou  les  Eglises,  qu'ilz  en  cherchent  d'aultros  idoines  et  suffisans.  Or  s'il  y  en  a  quelqu'un  moyennement  scavant,  et  qu'il  semble  povoir  estre  admis,  qu'il  soit  retenu,  estant  par  l'espace  d'un  moys  ou  deux  enseigne  par  quelque  examinateur.  Car  telz  examinateurs  ne  doyvent  pas  estre  seulement  auditeurs  oyseux,  de  ceulx  qu'on  ordonne:  mais  aussi  ilz  doyvent  prendre  la  peine  d'enseigner  les  ignorans  et  de  les  ouyr  souvent.  Et  que  les  Evesques  ou  gouverneurs  ayent  le  soing  et  esgard,  que  les  paovres  qui  sont  a  ordonner  ayent  cependant  leur  vie,  et  qu'ilz  soyent  pourveuz  de  quelques  petis  livres  necessaires.  S'ilz  pensent  que  ceste  gratuite  est  de  trop  grand  fraiz  et  despens,  qu'ilz  scachent  qu'il  n'y  a  aumosne  quelconque  plus  saincte,  que  d'ayder  aux  paovres  en  leur  estude,  et  de  pourveoir  aux  Eglises:  recongnoissans  que  si  grandes  richesses  leur  ont  este  donnees  pour  en  faire  telles  aumosnes.  Donc  ilz  feront,  que  les  paovres  qui  pourront  estre  ordonnez,  ayent  logis  et  precepteurs.  Or  a  celle  fin,  que  les  Pasteurs  et  aultres  Ministres  de  l'Eglise,  Prestres  et  Diacres,  puissent  invoquer  Dieu  en  bonne  conscience  et  vraye  foy,  que  ceste  loy  et  obligation  qui  defent  le  mariage  aux  Prestres,  soit  abolie,  et  que  on  puisse  eslire  gens  mariez  honnestes,  pour  estre  Prestres:  c'est  a  scavoir  pour  enseigner  l'Evangile  et  administrer  les  Sacrementz,  que  ceulx  aussi  qui  ont  este  ordonnez  devant  que  estre  mariez,  puissent  apres  leur  ordination  contracter  mariage  honneste.  Car  si  cela  n'est  ottroye,  plusieurs  lieux  seront  sans  Pasteurs,  et  est  a  craindre,  que  les  Eglises  ne  soyent  desolees  et  desertes.  Comme  desia  nous  scavons  bien,  qu'en  plusieurs  lieux  en  Allemaigne,  qui  sont  soubz  la  puissance  des  Evesques,  il  y  a  faulte  de  Pasteurs.  Doncques,  [fol.  130]  que  la  tradition  humaine  quitte  la  place,  et  que  la  loy  iniuste  donne  lieu  a  la  necessite  publicque  et  dignite  du  ministere:  et  a  celle  fin,  que  cela  soit  garde,  que  les  lyens  et  obligations  iniustes,  qui  espouvantent  et  destournent  les  gens  de  bien  et  modestes  de  tel  office,  soyent  ostez.  Veritablement  toutes  gens  modestes  tremblent  de  tout,  et  de  corps  et  d'ame,  quand  ilz  pensent