48:620  scavons  que  Iesus  Christ  est  en  haut,  il  faut  que  nous  apprenions  de  renoncer  au  monde,  pour  estre  unis  a  luy.  Il  y  a  longue  distance  de  luy  a  nous  et  pourtant  nous  en  serons  separez,  sinon  que  nous  prenions  le  moyen  que  S.  Paul  nous  donne,  qui  est  de  despouiller  ces  membres  terrestres,  lesquels  il  explicque  apres,  et  dit  que  c'est  paillardise,  avarice,  gourmandise,  orgueil,  envie  et  toutes  choses  semblables.  Voulons-nous  donc  estre  participans  de  ceste  ascension?  Il  ne  faut  point  que  nous  soyons  separez  de  luy.  Mais  comment  y  serons-nous  conioints?  II  nous  faut  despouiller  de  ces  membres  terrestres  et  des  choses  qui  nous  tienent  yci  bas.  Les  uns  sont  addonnez  a  paillardise,  les  autres  a  vengence,  les  autres  a  gourmandise,  et  les  autres  a  d'autres  vices.  Or  tout  ainsi  que  la  foy  nous  esleve  en  haut,  il  faut  aussi  que  nos  affections  la  suyvent,  afin  que  nous  renoncions  a  tout  le  monde  et  a  toutes  choses  qui  nous  pourroyent  empescher  d'estre  unis  a  nostre  Chef.  Voyla  quant  a  ce  qui  est  dit  qu'il  viendra  ainsi  qu'on  l'a  veu  aller  au  ciel,  afin  que  nous  apprenions  de  nous  unir  a  luy  par  affection  de  nostre  coeur.  Par  ceci  les  Anges  ne  pretendent  pas  parler,  ne  des  robbes  qu'avoit  Iesus  Christ,  ne  des  autres  choses:  comme  beaucoup  de  fantastiques  cherchent  des  choses  qui  ne  sont  ne  requises  ni  utiles  a  salut,  mais  les  Anges  ont  dit  cela  pour  monstrer  qu'il  viendra  visiblement.  Comme  s'ils  disoyent  aux  Apostres:  II  vous  fait  mal  que  vostre  Maistre  vous  est  oste  de  devant  vos  yeux:  mais  qu'il  ne  vous  face  point  mal  de  cela,  car  vous  le  verrez  revenir  en  ceste  immortalite  glorieuse  ou  il  est  maintenant.  Or  les  Papistes  ont  d'autres  subtilitez  de  petis  enfans,  pour  dire  que  leur  Dieu  est  en  leur  messe,  et  qu'ils  l'ont  avec  eux  pour  s'en  iouer  ainsi  que  bon  leur  semble.  Il  disent  qu'il  est  vray  que  Iesus  Christ  viendra  au  iugement  visiblement  et  apertement,  mais  que  maintenant  il  vient  en  cachetes  et  couvertement.  Vray  est  qu'il  vient  iournellement  a  nous  :  ce  n'est  pas  pour  neant  que  l'Escriture  dit  que  nous  sommes  visitez  de  Dieu.  Et  aussi  nous  disons  bien  que  l'Evangile  nous  est  tesmoignage  de  sa  presence.  Mais  il  faut  noter  comment  c'est  qu'il  habite  avec  nous.  S.  Paul  dit  que  c'est  par  foy.  Il  ne  faut  donc  point  que  nos  resveries  ayent  lieu,  mais  que  nous  l'entendions  ainsi  que  S.  Paul  en  parle,  disant,  Ne  scavez  vous  pas  que  vous  estes  le  temple  de  Dieu  auquel  il  habite?  Ainsi  comme  Dieu  est  par  tout  et  en  toutes  choses  invisiblement,  Iesus  Christ  se  communique  a  nous.  Et  quand  nous  sommes  unis  a,  luy,  nos  ames  sont  nourries  de  la  substance  de  son  corps  (combien  qu'il  soit  la  haut  au  ciel),  mais  cela  se  fait  par  la  vertu  de  la  foy  et  par  le  S.  Esprit.  Car  Iesus  Christ  ne  descend  point  corporellement.  Pourquoy  les  Papistes  sont  par  trop  ignorans  de