35:620  Au  reste  le  Prophete  notamment  dit,  nous  T  avons  vety,  et  V  avons  desdaigne,  pour  monstrer  que  nostre  Seigneur  Iesus  sera  mesprise  et  reiette  non  seulement  de  quelque  nombre  de  gens,  mais  de  la  plus  grande  multitude:  voire  de  ce  peuple  qui  luy  estoit  comme  peculier.  Car  le  Prophete  en  se  mettant  du  rang  de  ceux  qui  ont  reiette  nostre  Seigneur  Iesus  Christ,  regarde  a  son  peuple,  c'est  a  dire  aux  Iuifs  desquels  il  est  nay:  et  outre  cela  aussi  il  veut  monstrer  que  c'a  este  l'opinion  commune,  et  que  quasi  partout  Iesus  Christ  a  este  reiette.  Ainsi  nous  sommes  encores  tant  plus  munis,  pour  ne  nous  point  attacher  a  la  fantasie  des  hommes,  quand  non  seulement  nous  en  verrons  une  centaine  d'infideles,  mais  qu'ils  viendront  en  grosses  foulles  et  avec  grosses  armees,  qu'ils  viendront  par  millions,  et  qu'entre  cent  a  grand  peine  en  trouvera-on  trois  ou  quatre  qui  se  rangent  paisiblement  a  nostre  Seigneur  Iesus  Christ:  quand  nous  verrons  cela,  que  nous  ne  laissions  pas  toutes  fois  d'adherer  a  luy;  voyla  en  somme  ce  que  nous  avons  a  retenir  de  ce  passage.  Car  auiourd'huy  nous  voudrions  conter  les  voix:  et  beaucoup  de  gens  infirmes  regardent,  Et  quoy?  il  n'y  a  qu'une  petite  poingnee  de  gens  qui  croyent  a  l'Evangile:  et  si  on  surmontoit  en  nombre,  encores  ie  m'y  rangeroye  volontiers:  mais  que  ie  m'aille  mettre  avec  une  si  petite  portion,  et  que  ie  laisse  la  plus  grande  multitude,  que  seroit-ce?  Or  afin  de  coupper  broche  a  telles  obiections,  le  Prophete  dit  qu'il  n'y  en  aura  pas  seulement  quatre  ou  dix,  mais  que  quasi  tous  en  general  refuseront  d'obeir  a  nostre  Seigneur  Iesus  Christ.  Et  mesmes  il  n'y  a  nulle  doute  qu'il  ne  veuille  taxer  les  Iuifs  en  particulier:  car  desia  nous  avons  allegue  du  8.  chapitre,  qu'il  devoit  estre  en  scandale  a  toutes  ces  deux  maisonsla,  c'est  ascavoir  a  la  lignee  d'Abraham.  Voyla  donc  le  peuple  qui  estoit  de  Dieu  par  dessus  tout  les  autres,  et  semble  bien  qu'il  deust  cognoistre  son  Redempteur.  Car  a  qui  est-ce  que  Iesus  Christ  a  este  promis?  Aux  Iuifs:  comme  il  est  dit  qu'il  est  ministre  de  la  Circoncision,  afin  d'accomplir  les  promesses  que  les  Peres  avoyent  receues.  Les  Iuifs  donc  devoyent  estre  tout  accoustumez  a  Iesus  Christ  devant  qu'il  apparust  au  monde,  et  le  recevoir  sans  difficulte  aucune:  or  il  est  dit  qu'ils  l'ont  reiette,  voire  les  edifians  mesmes,  c'est  a  dire  les  principaux  qui  avoyent  la  charge  du  peuple.  Et  ceci  se  trouvera  encores  auiourd'huy:  car  ce  ne  sont  pas  seulement  les  Turcs  et  les  Payens  qui  reiettent  Iesus  Christ,  mais  ceux  qui  usurpent  le  nom  de  Chrestiente,  et  le  falsifiant,  et  mesmes  ceux  qui  font  profession  de  l'Evangile  seront  souvent  gens  profanes,  mocqueurs  de  Dieu,  et  vileins,  qui  voudroyent  que  toute  doctrine  de  salut  fust  abolie,  et  ce  qu'ils  la  retiennent  encores,  c'est  seulement