23:620  quam  autem  hic  Deus  in  bonum  cogitasse  dicitur,  quia  prosperum  laetumque  successum  mortiferis  principiis  ex  inopinato  attulerat:  recte  tamen  et  iuste  cibum  reprobis  in  venenum,  lucem  in  tenebras,  mensam  in  laqueum,  vitam  denique  in  mortem  convertit.  Si  ad  tantam  altitudinem  non  perveniant  humanae  mentes,  mysteria  quae  non  capiunt,  suppliciter  potius  adorent  quam  figulina  vascula  superbiant  contra  suum  opificem.  20.  Ut  vivificaret  populum  meum.  Finem  providentiae  Dei  ad  suum  officium  accommodat  Ioseph.  Et  haec  sobrietas  adhibenda  semper  est,  ut  quisquis  Deum  ex  alto  mundi  gubernacula  tenentem  fide  speculatur,  se  intra  vocationis  suae  metas  contineat  :  imo  arcanis  Dei  iudiciis  admonitus,  in  se  ipsum  descendat,  seque  ad  officium  hortetur.  Quod  si  non  protinus  apparet  ratio,  cavendum  tamen  est  ne  volitemus  per  confusos  et  erraticos  circuitus,  quemadmodum  fanatici  homines  solent.  Quod  dicit  Ioseph  se  divinitus  electum  esse,  per  quem  multus  populus  servetur,  quidam  ad  Aegyptios  extendunt:  quod  tametsi  non  improbo,  restringere  tamen  malo  ad  domum  Iacob:  nam  Dei  bonitatem  hac  circumstantia  Ioseph  amplificat,  quod  sua  opera  ab  interitu  ereptum  fuerit  ecclesiae  semen.  Et  certe  in  paucis  hominibus  ingens  illa  multitudo,  quam  paulo  post  Deus  extulit,  vitam  adepta  est,  cuius  alioqui  antequam  nasceretur,  exstinctum  esset  semen.  21.  Ego  alam  vos.  Hoc  vero  solidae  ac  non  fucatae  reconciliationis  signum  fuit,  non  modo  abstinere  a  maleficio  et  noxa,  sed  etiam  vincere  bono  malum  sicuti,  Paulus  praecipit  (Rom.  12,  ll).  Et  certe  qui  cessat  in  officio,  quum  iuvandi  suppetat  facultas,  et  res  opem  eius  flagitet,  hoc  ipso  demonstrat  se  non  oblitum  esse  iniuriae.  Quod  ideo  diligenter  notandum  est,  quia  vulgo  nimis  ieiune  maior  pars  se  remittere  offensas  definit,  si  non  retaliat:  quasi  vero  non  sit  hoc  ulcisci,  quum  manum  retrahimus  ab  auxilio.  Iuvares  fratrem  si  dignum  existimares:  opem  tuam  implorat  in  necessitate,  tu  deseris,  quia  de  te  male  meritus  est:  quid  tibi  obstat  praeter  odium?  Ergo  tunc  demum  probabimus  nobis  a  malevolentia  puros  esse  animos,  si  beneficiis  prosequemur  hostes  a  quibus  indigne  tractati  sumus.  Dicitur  Ioseph  ad  cor  fratrum  loquutus,  quia  suaviter  et  amice  eos  compellans,  omnem  illis  scrupulum  exemit:  quemadmodum  prius  vidimus  Sichem  loquutum  esse  ad  cor  Dina,  quum  blanditiis  solari  conatus  est,f  ut  illati  stupri  immemor,  coniugio  animum  adiiceret.  22.  Et  habitavit  Ioseph.  Non  sine  causa  refert  Moses  quamdiu  vixerit  Ioseph,  quia  diuturnitas  temporis  infractam  eius  constantiam  clarius  ostendit.  Quamvis  enim  honore  et  potentia  emineret  inter  xlegyptios,  coniungitur  tamen  cum  domo  patris  sui.  Unde  coniicere  promptum  est,  paulatim  valedixisse