49:62  iusti  censemur,  quia  pretio  redempti,  certe  aliunde  mutuamur,  quod  in  nobis  non  est.  Et  mox  clarius  exponit  Paulus  quid  ista  redemptio  valeat,  vel  quorsum  spectet:  nempe  ut  Deo  reconciliemur.  Christum  enim  propitiationem,  vel  (quod  magis  placet,  ut  sit  allusio  ad  veterem  figuram)  propitiatorium  vocat.  Quid  autem  id  sibi  vult,  nisi  nos  esse  iustos,  quatenus  Christus  nobis  patrem  propitiat?  Sed  iam  expendere  verba  convenit.  25.  Quem  proposuit1).  Quia  verbum  graecum  TupoTtfrevai,  nunc  ante  decernere  significat,  nunc  in  medium  proferre:  si  prior  expositio  recipitur,  refert  Paulus  ad  gratuitam  Dei  misericordiam,  quod  ordinatus  fuerit  Christus  mediator,  qui  patrem  nobis  sacrificio  mortis  suae  placaret.  Neque  enim  vulgaris  est  gratiae  commendatio,  quod  rationem  ultro  Deus  quaesivit,  qua  maledictionem  nostram  tolleret.  Et  certe  locus  hic  videtur  cum  illo  congruere:  Sic  Deus  dilexit  mundum,  ut  filium  suum  unigenitum  daret.  Quamquam  si  alterum  sensum  amplectimur,  eadem  manebit  ratio:  quod  Deus  in  medium  suo  tempore  repraesentavit,  quem  apud  se  mediatorem  decreverat.  In  voce  tXaanfjpcov  placet  esse  allusionem  (ut  dixi)  ad  vetus  propitiatorium.  Id  enim  re  ipsa  in  Christo  exhibitum  docet,  quod  illic  figurabatur.  Quia  tamen  improbari  non  possit  diversa  opinio,  si  quis  simplicius  accipere  malit,  in  medio  relinquam.  Quod  potissimum  voluit  hic  Paulus,  certo  ex  eius  verbis  evincitur,  Deum  sine  Christo  semper  iratum  nobis  esse:  reconciliari  nos  per  eum,  dum  iustitia  eius  accepti  sumus.  Non  enim  detestatur  in  nobis  Deus  opus  suum,  id  est,  quod  conditi  sumus  homines:  sed  nostram  immunditiem,  quae  lucem  imaginis  suae  exstinguit.  Eam  ubi  abstersit  Christi  ablutio,  nos  ut  purum  opus  suum  amat  ille  et  osculatur.  Propitiatorium  per  fidem  in  sanguine  eius.  Ita  magis  placet  ad  verbum  retinere  quod  habet  Paulus:  siquidem  mihi  videtur  uno  contextu  voluisse  dicere,  propitium  nobis  Deum  reddi  simul  ac  in  Christi  sanguine  repositam  habemus  fiduciam:  quia  per  fidem  in  eius  beneficii  possessionem  venimus.  Sanguinem  autem  solum  nominando  non  voluit  alias  redemptionis  partes  excludere,  sed  potius  sub  una  parte  totam  summam  comprehendere:  sanguinem  vero  nominavit,  in  quo  habemus  nostrum  lavacrum.  Sic  per  synecdochen  tota  expiatio  notatur.  Nam  quum  nuper  dixisset  pacificatum  esse  Deum  in  Christo,  nunc  addit  fide  hunc  effectum  constare:  et  simul  quid  fides  nostra  praecipue  in  Christo  respicere  debeat.  Propter  remissionem  delictorum2).  Tantundem  *)  Hic  proponere  non  proferre  significat,  aut  in  medium  repraesentare,  sed  praeordinare  et  praestituere,  ut  ad  clementiam  Dei  referatur,  quae  rationem  ultro  exquisivit  quae  nostrae  miseriae  succurreret.  2)  Istud  ota,  si  liceat,  malim  resolvere  in  per:  frigidum  enim  sensum  habebis  si  causaliter  accipias.