47:62  sed  habeat  vitam  aeternam,  17.  Non  enim  misit  Deus  filium  suum  in  mundum,  ut  condemnet  mundum,  sed  ut  servetur  mundus  per  eum.  18.  Qui  credit  in  eum,  non  condemnatur:  qui  vero  non  credit,  iam  condemnatus  est,  quia  non  credidit  in  nomen  unigeniti  filii  Dei.  13.  Nemo  adscendit  in  coelum.  Iterum  hortatur  Nicodemum,  ne  sibi  ac  suae  perspicaciae  confidat,  neminem  enim  mortalium  posse  sua  industria  in  coelum  penetrare,  nisi  qui  duce  filio  Dei  illuc  tendet.  Adscensus  enim  in  coelum  puram  mysteriorum  Dei  notitiam,  et  spiritualis  intelligentiae  lucem  significat.  Idem  enim  hoc  loco  docet  Christus,  quod  Paulus,  quum  pronuntiat,  non  capere  hominem  animalem  quae  Dei  sunt  (1.  Cor.  2,  14).  Itaque  totum  humani  ingenii  acumen  a  rebus  divinis  arcet,  quia  longe  infra  Deum  subsidit.  Sed  notanda  sunt  verba:  Solum  Christum,  qui  coelestis  est,  in  coelum  adscendere,  aliis  omnibus  praeclusum  esse  ingressum.  Nam  priore  membro  nos  humiliat,  quum  totum  mundum  a  coelo  prohibet.  Iubet  Paulus  stultescere  apud  se  ipsos,  quicunque  Deo  sapere  cupiunt  (1.  Cor.  3,  18).  Nihil  minus  libenter  facimus.  Ergo  tenenda  est  sententia,  evanescere  ac  deficere  sensus  omnes  nostros,  quum  ad  Deum  venitur,  sed  postquam  coelum  nobis  clausit  Christus,  remedium  in  promptu  offert,  quum  addit  filio  hominis  datum  esse  quod  omnibus  aliis  negatum  est.  Neque  enim  quod  adscendit  in  coelum,  id  sibi  privatim  ac  solus  facit,  sed  ut  nobis  dux  sit  et  director.  Atque  hac  causa  vocavit  se  filium  hominis,  ne  dubitemus  communem  nobis  cum  eo  esse  ingressum:  qui  ideo  carnem  nostram  induit,  ut  nos  bonorum  omnium  consortes  haberet.  Quum  ergo  unus  sit  patris  consiliarius,  admittit  nos  in  ea  arcana  quae  in  abdito  alioqui  laterent.  Videtur  tamen  hoc  esse  absurdum,  quod  se  dicit  esse  in  coelo,  quo  tempore  in  terra  habitat.  Si  respondeas,  verum  esse  illud  respectu  divinitatis,  loquendi  modus  aliud  sonat,  quod  scilicet  homo  ipse  in  coelo  fuerit.  Dici  posset  non  fieri  loci  mentionem,  sed  conditione  tantum  discerni  Christum  a  reliquis,  quia  haeres  sit  regni  Dei,  a  quo  totum  genus  humanum  exsulat:  sed  quum  in  Christo  propter  unitatem  personae  satis  frequens  ac  tritum  sit,  quod  unius  naturae  proprium  est  ad  alteram  transferri,  non  alia  solutio  quaerenda  est.  Christus  ergo  qui  in  coelo  est  carnem  nostram  induit,  ut  porrecta  nobis  fraterna  manu  secum  nos  ad  coelum  evehat.  14.  Et  sicuti  Moses.  Clarius  explicat  quorsum  dixerit  se  unum  esse  cui  apertum  est  coelum  :  nempe  ut  omnes  illuc  inducat,  qui  modo  eum  sequi  ductorem  volent.  Se  enim  palam  omnibus  et  aperte  expositum  fore  testatur,  ut  suam  ad  omnes  virtutem  diffundat.  Exaltari  significat  collocari  in  loco  edito