45:62  cens,  Ioseph  fili  David,  ne  metuas  assumere  Mariam  uxorem  tuam:  nam  quod  in  ea  conceptum  est,  ex  spiritu  sancto  est.  21.  Pariet  autem  filium,  et  vocabis  nomen  eius  Iesum.  Is  enim  salvum  faciet  populum  suum  a  peccatis  eorum.  22.  Porro  totum  hoc  factum  est,  ut  impleretur  quod  dictum  est  a  Domino  per  prophetam,  dicentem,  23.  Ecce,  virgo  praegnans  erit,  et  pariet  filium,  et  vocabunt  nomen  eius  Immanuel.  Quod  si  quis  interpretetur,  valet,  Nobiscum  Deus.  24.  Excitatus  vero  Ioseph  a  somno,  fecit  sicut  ei  praeceperat  angelus  Domini,  et  assumpsit  uxorem  suam:  25.  Et  non  cognovit  eam,  donec  peperit  filium  suum  primogenitum,  et  vocavit  nomen  eius  Iesum.  18.  Iesu  Christi  nativitas.  Nondum  exponit  Matthaeus,  ubi  aut  qualiter  natus  sit  Christus,  sed  quomodo  coelestis  eius  generatio  ipsi  Ioseph  comperta  fuerit.  Dicit  primum,  inventam  fuisse  Mariam  gravidam  ex  spiritu  sancto:  non  quod  arcanum  illud  Dei  opus  vulgo  notum  foret,  sed  cum  hominum  notitia  miscet  spiritus  virtutem,  quae  adhuc  latebat.  Tempus  notat,  quum  desponsa  esset  Ioseph,  prius  tamen  quam  convenirent.  Nam  quoad  fidem  coniugii,  simul  ac  puella  viro  promissa  erat,  Iudaei  instar  legitimae  uxoris  habebant.  Itaque  lex  adulterii  damnabat,  quae  sponsalibus  contractis  castitatem  violaverant.  Verbum  quo  utitur  evangelista,  vel  concubitum  verecunde  notat,  vel  simpliciter  accipitur  pro  simul  habitare,  ut  domum  et  familiam  unam  efficiant  maritus  et  uxor.  Ita  sensus  erit,  nondum  virginem  traditam  fuisse  in  manum  viri  a  parentibus,  sed  adhuc  sub  eorum  custodia  vixisse.  19.  Quum  iustus  esset.  Quidam  interpretes  intelligunt,  Ioseph,  ideo  quod  iustus  esset,  voluisse  uxori  parcere:  ita  iustitia  illis  est  humanitas,  vel  moderatio  animi  ad  clementiam  propensior.  Sed  alii  rectius,  qui  haec  duo  membra  adversative  legunt,  iustum  quidem  fuisse  Ioseph,  sed  tamen  de  fama  uxoris  fuisse  sollicitum.  Proinde  iustitia,  quae  hic  laudatur,  in  odio  et  detestatione  sceleris  fuit.  Quia  suspectam  adulterii  habebat  uxorem,  imo  adulteram  esse  persuasus  erat,  tale  scelus  nolebat  indulgentia  sua  fovere.  Et  certe  uxoris  suae  leno  est,  quisquis  ad  eius  impudicitiam  connivet:  nec  tantum  a  tali  flagitio  abhorrent  ingenuae  et  honestae  mentes,  sed  illam  quam  dixi  socordiam  leges  notant  infamia.  Ergo  Ioseph  iustitiae  zelo  quod  putabat  esse  in  uxore  crimen  damnavit:  interea  proclivis  ad  humanitatem  animus  obstabat,  ne  summo  iuris  rigore  ageret.  Media  illa  erat  et  magis  temperata  ratio,  si  clanculum  discedens  alio  migraret.  Unde  colligimus,  non  ita  molli  et  effeminato  fuisse  animo,  ut  misericordiae  praetextu  crimen  tegendo  aleret:  tantum  aliquid  remisit  ex  summo  iure,  ne  uxorem  turpi  iudicio  exponeret.  Nec  vero  dubium  nobis  esse  debet,  quin  arcano  spi-