41:62  est  illud  Isaiae  (42,  8),  Vivo  ego,  dicit  Dominus,  gloriam  meam  alteri  non  dabo.  Quoniam  ergo  fieri  non  potest,  ut  gloria  Dei  transeat  vel  ad  hominem  vel  ad  ullam  creaturam,  sequitur  nunc  fulgere  in  humana  Christi  natura  veram  Dei  unitatem  et  naturam  :  quoniam  flectitur  coram  ipso  omne  genu.  Nunc  ergo  tenemus  quo  sensu  dicat  propheta,  Venisse  Christum  ut  filium  hominis,  hoc  est,  qui  erat  similis  homini:  venisse  usque  ad  Antiquum  dierum:  quia  postquam  praeteriit  tempus  exinanitionis,  ut  verbo  Pauli  utamur,  Christus  in  coelos  conscendit,  et  ita  datum  illi  fuit  imperium,  sicuti  proximo  versu  dicit  propheta.  Ergo  minime  dubium  est,  locum  hunc  debere  accipi  de  Christi  adscensu,  postquam  scilicet  desiit  esse  homo  mortalis.  Dicit  fuisse  repraesentatum  coram  Deo,  nempe  quia  sedet  ad  eius  dexteram.  Sequitur,  14.  Et  ei  data  (fuit)  potestas,  et  gloria  (vel,  decus),  et  regnum  :  et  omnes  populi,  nationes  et  linguae  ei  servient:  potestas  eius  potestas  saeculi  (aeterna),  quae  non  auferetur,  et  regnum  eius  non  corrumpetur  (vel,  non  abolebitur).  Confirmat  et  clarius  etiam  explicat  propheta  hoc  versu  quod  prius  dixit.  Nam  hinc  colligi  potest  quomodo  pervenerit  homo  ille  ad  Antiquum  dierum,  hoc  est,  ad  Deum:  nempe  quia  data  fuit  ei  potestas.  Nam  etsi  vere  in  coelum  adscendit  Christus,  simul  tamen  expendere  convenit  in  quem  finem  :  ut  scilicet  summa  potestas  esset  penes  ipsum  in  coelis  et  in  terra,  quemadmodum  ipse  loquitur.  Et  Paulus  etiam  finem  hunc  primo  et  secundo  ad  Ephesios  capite  ostendit,  quod  scilicet  Christus  relicto  mundo  conscenderit  ad  patrem,  ut  subiiceret  sibi  omnes  potestates,  ut  angeli  ei  parerent:  deinde  ut  diabolum  compesceret,  ut  ecclesiam  protegeret  suo  auxilio  et  servaret:  denique  omnes  electos  Dei  patris.  Sic  ergo  nunc  Daniel  prosequitur  quod  prius  dixit  de  accessu  Christi  ad  Deum.  Et  hinc  refellitur  eorum  vesania,  qui  colligunt  Christum  non  esse  verum  et  aeternum  Deum,  quia  dicitur  ad  Antiquum  dierum  venisse.  Sed  primo,  ut  dictum  fuit,  hoc  intelligitur  de  mediatoris  persona:  deinde  tollitur  omnis  ambiguitas,  ubi  propheta  adiungit  datam  fuisse  potestatem.  Ecce  igitur  certa  explicatio.  Non  dicemus  fuisse  datam,  quatenus  est  Deus  et  vocatur.  Data  igitur  fuit  mediatori,  nempe  Deo  in  carne  manifestato,  et  quidem  respectu  humanae  naturae.  Videmus  ergo  quam  bene  omnia  conveniant,  ubi  propheta  hic  Christo  dicit  datam  fuisse  summam  potestatem.  Tenendum  enim  est,  hoc  ad  manifestationem  referri,  quia  ab  initio  Christus  fuit  vita  hominum,  mundus  per  ipsum  creatus  est:  deinde,  eius  virtute  fuit  semper  sustentatus:  sed  data  fuit  potestas,  ut  sciamus  Deum  regnare  per  eius