33:62  il  les  resveille  aussi,  afin  qu'ils  cheminent  en  plus  grand'  crainte.  Car  si  nous  ne  pensions  point  avoir  d'ennemi  qui  nous  fist  la  guerre,  et  qui  ne  fust  pas  si  puissant,  nous  serions  nonchalans,  et  vivrions  ici  comme  en  paix.  Voici  Dieu  qui  nous  declare  que  Satan  est  un  lion  bruyant,  qui  a  tousiours  la  gueule  ouverte  pour  nous  engloutir:  que  nous  n'avons  point  armures  pour  luy  resister,  sinon  qu'il  nous  en  donne:  qu'il  faut  que  nostre  force  viene  de  luy:  cela  est  bien  pour  nous  faire  penser  a  nous,  et  que  nous  soyons  sur  nos  gardes,  et  ne  soyons  point  endormis:  car  le  diable  nous  auroit  tantost  prins  au  despourveu.  Ainsi  donc  voila  pourquoy  l'Escriture  nous  dit  que  le  Diable  est  prince  du  monde,  voire  afin  de  nous  humilier  en  premier  lieu,  et  puis  de  nous  instruire  a.  crainte  et  sollicitude,  que  nous  invoquions  Dieu,  le  prians  qu'il  ne  permette  point  que  nous  tombions  entre  les  laqs  de  Satan  :  et  puis  que  nous  luy  demandions  qu'il  nous  fortifie,  comme  il  a  promis  de  faire,  et  que  nous  facions  tousiours  bon  guet.  Au  reste  aussi  d'autre  coste,  afin  que  la  puissance  de  Satan  ne  nous  soit  point  trop  terrible  pour  nous  faire  perdre  courage,  et  nous  mettre  en  desespoir,  il  nous  est  dit,  qu'il  ne  peut  rien  sans  l'authorite  de  Dieu,  qu'il  faut  qu'il  prenne  son  conge  de  la,  et  que  quand  il  aura  iette  feu  et  flamme,  si  ne  peut-il  rien,  sinon  que  Dieu  luy  permette  ce  que  bon  luy  semblera.  Il  est  vray  que  le  diable  ne  laissera  point  d'estre  forcene,  il  se  iette  a  l'abandon  :  mais  quoy  qu'il  en  soit,  si  est-ce  que  Dieu  ne  luy  permettra  iamais  de  faire  sinon  ce  qu'il  trouvera  bon,  et  non  plus.  Voila  donc  a  quel  propos  il  nous  est  ici  declare,  que  le  diable  se  met  entre  les  enfans  de  Dieu:  ce  n'est  pas  qu'il  s'insinue,  comme  s'il  eust  este  de  la  compagnie,  et  du  rang  des  Anges,  mais  c'est  pour  nous  monstrer  qu'il  est  sous  l'obeissance  de  Dieu,  comme  les  Anges:  toutesfois  c'est  bien  en  une  autre  qualite,  car  le  sainct  Esprit  le  nomme  adversaire,  les  Anges  sont  appelez  enfans  de  Dieu,  pour  signifier  que  les  Anges  obeissent  de  leur  bon  gre,  qu'ils  sont  serviteurs  volontaires,  et  Satan  est  force,  qu'il  n'y  a  que  necessite,  et  contrainte  en  luy.  Or  venons  maintenant  a  ce  que  l'Escriture  adiouste:  Que  Dieu  a  demande  a  Satan,  d'ou  il  venoit,  et  il  a  respondu,  De  circuir  la  terre,  voire  pour  faire  la  chasse.  Quand  un  tel  recit  est  fait,  cognoissons  tousiours  que  c'est  pour  nostre  infirmite,  car  Dieu  n'a  que  faire  de  s'enquerir  que  c'est  que  Satan  a  fait  au  monde.  Mais  quoy?  d'autant  que  nous  ne  comprenons  point  ces  choses  en  nostre  rudesse,  et  en  une  si  petite  mesure,  comme  elle  est  en  nostre  sens,  il  faut  (comme  i'ay  dit)  qu'il  y  en  ait  une  declaration  qui  nous  soit  convenable.  Et  en  cela  voyons-nous  la  bonte  de  Dieu,  de  ce  qu'il  se  conforme  a  nous,  d'autant  que  nous  ne  pouvons