27:62  esmeus  a  amour  ou  a  haine:  car  tout  cela  n'est  ne  de  mise,  ne  de  recepte  envers  Dieu.  Quand  nous  viendrons  devant  luy,  il  regardera  nos  coeurs  tout  premierement:  et  encores  que  maintenant  ils  soyent  enveloppez,  et  qu'il  nous  semble  que  nous  ayons  nos  cachettes  pour  nous  couvrir,  si  est-ce  que  tout  viendra  en  clarte.  Ne  nous  trompons  point  donc  quant  a  ce  poinct-la.  Et  au  reste,  que  nous  sachions  que  Dieu  iugera  selon  la  verite  du  faict.  Nous  pourrons  maintenant  desguiser  les  choses,  comme  nous  faisons,  estans  de  nature  adonnez  a  hypocrisie:  mais  tous  ces  fards,  toutes  ces  belles  couleurs,  que  maintenant  nous  pretendons,  seront  effacees  quand  nous  viendrons  devant  Dieu.  Ainsi  cheminons  en  droicture,  et  integrite  de  coeur,  et  surtout  reiglons  toutes  nos  oeuvres  a  sa  Loy,  sachans  qu'il  n'a  point  esgard  aux  personnes:  et  que  par  cela  nous  soyons  tous  retenus.  Que  ceux  qui  ont  authorite,  et  qui  pourroyent  grever  les  petits,  et  les  foibles,  qu'ils  s'en  abstiennent  :  et  que  les  foibles  de  leur  coste  advisent  bien  que  Dieu  ne  laissera  pas  de  les  iuger,  puis  qu'il  n'est  point  accepteur  de  personne  :  et  pourtant  que  nous  n'apportions  que  droicture,  et  rondeur  de  conscience  devant  luy,  comme  il  n'y  a  rien  qui  vienne  en  conte  que  cela.  Ce  que  Moyse  adiouste  n'est  point  encores  sans  cause  :  Que  Dieu  ne  recoit  point  de  presens.  Il  est  vray  si  on  nous  demande,  Dieu  est-il  semblable  aux  Iuges  mortels  qui  se  corrompent  par  dons,  et  par  argent?  Il  n'y  aura  celuy  qui  ne  dise  que  non  :  et  mesmes  c'est  un  blaspheme  que  les  plus  meschans  auront  en  horreur.  Car  ils  diront,  Dieu  a-il  affaire  ne  d'or  ne  d'argent?  et  puis,  qu'il  soit  corruptible?  Cependant  si  ne  laissons-nous  pas  de  iuger  de  luy  ce  que  nous  savons  estre  faux.  Et  comment?  Car  tout  ainsi  que  nous  voyons  que  les  Iuges  terriens  sont  corrompus,  et  quand  on  leur  aura  graisse  les  mains,  qu'ils  se  laissent  mener,  et  que  la  ou  auparavant  ils  avoyent  donne  le  tort,  ils  donneront  le  droict,  qu'ils  flechissent,  qu'ils  changent:  il  nous  semble  que  nous  en  ferons  ainsi  avec  Dieu.  Nous  ne  le  dirons  pas  a  pleine  bouche:  mais  tant  y  a  que  iamais  les  hommes  ne  seroyent  si  hardis  a  mal  faire,  sinon  qu'ils  transfigurasset  Dieu,  et  qu'ils  se  feissent  accroire  qu'il  est  ployable,  et  qu'il  se  laisse  gagner  par  corruption.  Mais  venons  encores  a  ce  qui  a  este  accoustume  de  tout  temps.  Comment  est-ce  qu'on  a  cuide  appaiser  Dieu  en  la  papaute,  sinon  en  luy  portant  des  chandelles,  en  luy  faisant  des  perfums,  et  luy  faisant  quelques  autres  menus  fatras?  Il  a  semble  qu'il  se  contenteroit  de  tels  payemens:  comme  si  on  apportoit  quelque  present  a  un  Iuge  terrestre  pour  le  corrompre,  et  gagner.  Or  cela  n'a  pas  commence  par  la  Papaute.  Les  Iuifs  y  ont  este  trompez:  les  Payens  ont  eu  ces  superstitions-la:  combien  qu'aucuns