15:62  persequutionem  paterentur  et  affligerentur  ab  iis  qui  nec  patrem  nec  ipsum  cognoscerent?  Quis  Dei  spiritus  vos  unquam  ad  tam  immane  facinus  perpulisset?  Quando  unquam  persuadebitis  vel  posteris  vel  ecclesiae  in  evangelio  renascenti  vos  christiane  evangelice  et  religiose  fecisse,  quum  legent  vel  audient  vos  tam  atroci  vindicta,  impiorum  armis  succinctos,  privatam  causam  re  ipsa  satagentes,  hominem  peregrinum,  pietati  vestrae  confisum,  ad  vos  sponte  profectum,  solum  et  indefensum,  omni  suffragio  destitutum,  vestro,  id  est  capitalium  inimicorum  arbitrio  ventilatum,  lancinatum,  cum  immortali  odio  ignominia  et  ludibrio  traductum,  tam  crudeliter  et  immaniter  exstinxisse,  corpus  et  animam,  quantum  in  vobis  fuit,  occidere  properantes?  Audete  negare,  si  potestis,  vos  ei  non  fuisse  gravissimos  inimicos,  et  eius  scriptis  nominatim  non  offensos,  eius  sanguinem  non  totis  animis  expetivisse,  omne  consilium  et  operam  in  tollendo  adversario  et  gravissimis  suppliciis  afficiendo  non  adhibuisse,  mortem  eius  et  opprobrium  ridentibus  oculis  non  aspexisse,  ad  supplicium  eunti  illusoriis  verbis  non  insultasse.  Quid  moeres?  quid  gemis?  quid  suspiras?  Si  opinio  tua  vera  est,  cur  non  laetus  et  gaudens  abis?  Tales  erant  perfidorum  in  Dei  filium  voces:  Si  filius  Dei  es,  descende  de  cruce  et  credemus  tibi.  O  christianam  pietatem!  o  evangelicam  caritatem!  o  praeclarum  facinus  pro  tutela  et  quiete  ecclesiae  excogitatum!  Quis  tam  ferreus  et  neronianus  haec  audiens  non  horrescat?  Quis  tam  busiricus  et  adamantinus  haec  siccis  oculis  legat?  At  deerat  adhuc  spectaculo  naenia.  Confestim  editus  est  libellus10)  omnem  progressum  et  iudicium  probans.  Fuit  nimirum  illa  oratio  funebris  quae  exstincti  cineres  commendaret.  Accendite  flamma?,  o  tyranni!  Haereticos  a  vobis  iudicatos  scindite,  laniate,  torrete,  cineres  dispergite,  pacem  imperiis  et  sedibus  vestris  stabilite!  Quid  dubitatis?  quid  haeretis?  quid  cessatis?  Perdite,  mactate,  devorate!  Humano  divinoque  iure  fas  est.  Evange^  licos  ecclesiastes  et  theologos  luculentissimos  laudatores  habetis.  Sic,  sic  Deo  maximo  rite  litatur,  sic  evangelium  recte  propagatur,  sic  ecclesiae  pax  concordiaque  conservatur:  hostes  scilicet  haereticos  ferro  flammisque  tollendo.  Mortuus  non  luctatur.  Nunc  tandem  cognoscent  haeretici  evangelio  gladios  et  flammas  non  deesse:  nunc  tandem  sapit  ecclesia  quae  haereticos  didicit  de  viventium  terra  delere  et  zizania  de  medio  tritici  eradicare.  Nimium  mitis  Christus,  stultus  Gamaliel,  fatui  Paulus,  Ignatius  et  Augustinus,  qui  haereticos  dimitti  et  zizania  succrescere  voluerunt.  Vos  Gamaliele,  Paulo,  Ignatio  10)  Ex  hoc  loco  colliges  hanc  diatriben  post  mensem  Ianuarium  a.  1554  scriptam  fuisse.  Quam  hoc  potissimum  ioco  reponimus  quia  aliud  indicium  natalium  non  habemus.