5:619  ACTES  DE  RATISBONNE.  s'accoustuiner  a  quelque  chose  des  sa  ieunesse.  Puis  Dieu  crye  et  commande  si  souvent  es  sainctes  lettres,  que  la  doctrine  celeste  soit  enseignee  aux  enfans.  Et  pource  que  les  ceremonies  doyvent  attirer  et  mettre  les  hommes  en  train,  estans  signes  utiles  pour  advertir  et  enseigner  les  rudes,  il  fauldra  que  les  Prelatz  facent,  que  les  ceremonies  utiles  qui  sont  de  quelque  importance,  soyent  retenues,  et  que  celles  qui  sont  trop  lourdes  et  indignes  de  la  gravite  de  l'Eglise  soyent  abolies:  comme  ces  images  qu'on  porte  de  ca  et  de  la:  comme  aussi  en  aucuns  lieux  ou  la  croix  est  si  pesante,  qu'a  grand  peine  quatre  la  peuvent  porter,  etc.  Item,  certaines  images  et  peinctures  mensongieres  et  celles  qui  sont  adorees  en  superstition.  On  doit  recommander  aux  bons  et  prudens  gouverneurs  en  chascun  diocese,  qu'ilz  ayent  a  corriger  et  amender  telles  choses.  Mais  il  fault  bien  prendre  garde  quelz  sont  les  Pasteurs,  et  aultres  docteurs  et  Ministres  de  l'Eglise.  Or  il  advient  pour  [fol.  128]  deux  causes  principalement  qu'on  ne  depute  point  Ministres  suffisans:  l'une,  pource  que  les  collateurs  recommandent  les  ignorans  et  inutiles,  aucunesfoys  en  faveur  d'amitie  particuliere,  ou  par  corruption  d'argent,  ou  pour  aultres  causes,  qu'on  ne  doit  point  approuver:  ou  pource  que  les  Evesques  sans  aucun  esgard  ny  espreuve  receoyvent  un  chascun,  et  d'autant  qu'ilz  ne  sont  point  touchez  d'aucun  soing  des  Eglises,  a  ceste  cause,  ilz  ne  s'informent  ny  de  la  doctrine,  ny  des  meurs  des  Pasteurs,  ny  ne  deputent  aucuns  intendans,  qui  puissent  enseigner  les  ignorans.  Doncques  pour  obvier  a  ces  causes:  premierement  il  fauldra  deliberer  touchant  la  collation.  Il  sera  bon  que  l'election  canonique  soit  reduicte  en  son  entier,  et  ne  fauldra  permettre  que  les  ignorans  et  mal  morigerez  soyent  avancez  au  moys  Papal,  ny  par  aultres  occasions.  Oultreplus,  combien  que  nous  ne  voulions  pas  oster  le  droict  de  patronage:  toutesfoys,  quand  on  eslira  les  Pasteurs,  les  patrons  ne  doyvent  aucuns  recevoir,  qui  ne  soyent  approuvez  par  quelque  tesmoignage  de  l'Eglise,  c'est  a  dire  de  gens  de  honneur,  qui  seront  de  l'assemblee,  en  laquelle  il  est  donne  pour  Pasteur.  Et  que  les  Eglises  puissent  reiecter  les  meschans  et  non  suffisans,  ou  remettre  la  cause  aux  Evesques,  ou  a  ceux  qui  au  lieu  des  Evesques  ont  la  gubernation  ecclesiastique.  Que  les  Evesques,  ou  ceux  qui  seront  au  lieu  d'iceux,  n'ordonnent  aucuns  que  a  un  certain  ministere  de  l'Eglise.  Et  que  il  n'y  ayt  point  de  Prestres  oyseux,  ordonnez  seulement  pour  gaigner  leur  vie  a  lire  des  Messes,  comme  il  se  faict  communement.