35:619  619  S  E  R  M  O  N  S  620  trouveray-ie  quelque  recompense?  les  Anges  de  paradis  m'y  pourront-ils  aider?  Il  faut  donc  que  Iesus  Christ  comparuisse  en  mon  nom,  et  qu'il  se  constitue  mon  plege,  et  mon  garent.  Voyla  comme  la  mort  et  passion  de  nostre  Seigneur  Iesus  Christ  ne  nous  sera  plus  tournee  en  folie:  mais  nous  conceverons,  que  puis  que  nous  estions  ainsi  maudits,  et  qu'il  n'y  avoit  nul  remede  pour  trouver  grace  devant  Dieu,  puis  que  nous  l'avions  ainsi  provoque,  et  qu'il  nous  estoit  contraire  et  ennemi,  il  a  falu  que  nous  fussions  quant  et  quant  suiets  a  Satan,  et  a  sa  tyrannie,  iusques  a  tant  que  Iesus  Christ  nous  en  ait  delivre.  Voyla  (di-ie)  comme  nous  commencerons  de  magnifier  la  bonte  infinie  de  nostre  Dieu,  et  d'avoir  nos  pechez  en  detestation,  et  d'estre  la  si  confus  que  rien  plus.  Voyla  aussi  comme  le  scandale  que  nous  imaginons,  et  que  chacun  se  forge  en  la  mort  et  passion  de  nostre  Seigneur  Iesus  Christ,  sera  bientost  efface,  ascavoir  quand  nous  entrerons  en  nous  mesmes,  et  que  nous  ferons  un  bon  examen  de  nos  pechez,  et  cognoistrons  que  nous  sommes  si  detestables  a  Dieu,  qu'il  faut  que  luy  mesme  viene  en  la  personne  de  son  Fils  pour  en  faire  satisfaction,  et  pour  reparer  nos  iniquitez,  afin  que  par  ce  moyen  nous  luy  soyons  reconciliez.  Voyla  donc  l'ordre  que  le  Prophete  tient  yci.  Il  dit  d'un  coste  que  Iesus  Christ  n'aura  ne  forme  ne  figure,  et  qu'on  ne  pourra  pas  rien  trouver  en  luy  qui  soit  desirable.  Qui  plus  est,  qu'en  le  regardant  de  loin,  on  en  sera  estonne.  Mais  ayant  dit  toutes  ces  choses,  il  adiouste,  or  si  est-ce  qu'il  a  este  afflige  pour  nos  pecher  y  comme  s'il  disoit,  Povres  aveugles,  vous  ne  tenez  conte  du  Fils  de  Dieu,  et  mesme  chacun  par  son  ingratitude  se  ferme  la  porte,  tellement  que  vous  ne  pouvez  approcher  de  luy,  pour  obtenir  le  salut  qu'il  vous  apporte.  Qui  est  cause  de  cela?  c'est  que  vous  n'avez  point  cognu  vos  pechez,  pour  vous  humilier,  que  chacun  est  endormi,  voire  stupide,  et  se  nourrit  en  ses  vaines  flatteries:  mais  mirez  vous  en  vos  povretez  et  ordures,  et  alors  vous  aurez  honte  de  vostre  condition,  et  cognoistrez  qu'il  n'y  a  autre  moyen,  sinon  que  Iesus  Christ  viene  la  moyenner,  et  qu'il  prene  sur  sa  personne  ce  qui  estoit  pour  vous  rendre  ennemis  de  Dieu,  et  qu'il  soit  la  vostre  plege,  qu'il  se  constitue  comme  un  povre  pecheur,  qu'il  prene  tous  vos  fardeaux  et  les  porte  sur  soy.  Quand  donc  vous  penserez  a  toutes  ces  choses,  alors  vous  prendrez  bon  goust  pour  vous  ranger  au  Fils  de  Dieu,  et  ne  vous  arresterez  plus  a  vos  vaines  fantasies:  vous  ne  serez  plus  scandalisez  de  ce  que  Iesus  Christ  s'est  ainsi  aneanti,  quand  vous  cognoistrez  quelle  condamnation  vous  aviez  meritee,  et  quelle  recompense  et  satisfaction  y  estoit  requise.