23:619  619  COMMENTARIUS  IN  GENESIN.  620  centiae  legem  ac  necessitatem  imponat.  Tametsi  autem  hac  de  re  satis  multa  disseruimus  cap.  45  nonnihil  tamen  nunc  quoque.repetere  utile  erit.  Ac  primo  quidem  notanda  est  sermonis  diversitas:  nam  quum  illic  Ioseph  fratrum  dolorem  lenire  et  metum  levare  studens,  eorum  scelus  quo  poterat  artificio  tegeret,  nunc  paulo  apertius  et  liberius  eos  castigat:  forte  quia  eorum  astutia  offenditur.  Idem  tamen  retinet  principium,  quum  arcano  Dei  consilio  deductus  sit  in  Aegyptum,  ut  fratribus  vitae  minister  esset,  sibi  incumbendum  in  hoc  esse,  ne  Deo  resistat:  ac  si  diceret,  quum  vitam  vestram  Deus  apud  me  deposuerit,  ego  bellam  cum  eo  gererem  nisi  fidelis  essem  eius  gratiae  dispensator,  quam  mihi  dedit  in  manum.  Scite  interea  inter  prava  hominum  consilia  et  admirabilem  Dei  iustitiam  distinguit,  summam  rerum  omnium  gubernationem  Deo  ita  tribuens,  ut  nullam  ex  hominum  vitiis  maculam  contrahat.  Venditio  Ioseph  facinus  crudelitate  et  perfidia  detestabile  fuit:  atqui  venditus  non  fuit  nisi  coolesti  decreto.  Neque  enim  solum  quievit  Deus,  et  ad  tempus  connivens,  fraena  hominum  malitiae  laxavit  ut  hac  occasione  postea  uteretur:  sed  ordinem  agendi,  quem  volebat  certum  fixumque  esse,  suo  arbitrio  statuit:  ita  vere  et  proprie  dicemus  scelesta  fratrum  pactione,  et  arcana  Dei  providentia  venditum  fuisse  Ioseph.  Non  tamen  fecit  commune  opus  ut  quidquam  Deus  coniunctum  vel  affine  haberet  improbae  eorum  cupiditati:  quia  dum  illi  machinantur  fratri  exitium,  eorum  salutem  e  sublimi  procurat.  Unde  etiam  colligimus,  regendi  mundi  varias  illi  esse  rationes.  Hoc  quidem  promiscue  statuendum  est,  nihil  nisi  eo  volente  fieri:  quia  et  hominum  consilia  moderatur,  et  voluntates  flectit,  et  conatus  vertit  huc  vel  illuc,  et  eventus  temperat:  verum  si  quid  recte  et  iuste  suscipiunt  homines,  intus  eos  spiritu  suo  agit  ac  movet,  ut  merito  feratur  illi  acceptum  quidquid  boni  est:  si  autem  Satan  et  impii  ebulliunt,  ineffabili  modo  per  eorum  manus  ita  agit,  ut  penes  ipsos  resideat  improbitas,  et  illis  culpa  imputetur.  Neque  enim  ad  peccandum  spiritus  impulsu,  sicuti  fideles  ad  recte  agendum,  feruntur,  sed  sibi  ipsi  autores  sunt,  et  Satanam  sequuntur  ducem.  Sic  videmus  ut  in  media  caligine  nostrae  iniquitatis  refulgeat  Dei  iustitia.  Nam  neque  Deus  unquam  iusta  agendi  causa  destituitur,  et  homines  perversa  sua  voluntas  reatu  constringit.  Quum  audimus  Deum  frustrari  spes  hominum  improbas  et  noxias  cupiditates:  hinc  non  vulgaris  ad  nos  redit  consolatio:  satagant  enim  ut  volent  impii,  tumultuentur,  coelum  denique  ac  terram  misceant,  nihil  tamen  proficient  suo  fervore:  nec  modo  irriti  concident  eorum  impetus,  sed  in  contrarium  successum  volventur,  ut  salutem  nostram  quamvis  inviti  promoveant.  Ita  quidquid  veneni  concipit  Satan,  Deus  in  medicinam  electis  suis  temperat.  Quam-