5:618  Et  pource  que  la  coustume  ancienne  d'enseigner  le  Catechisme,  et  d'endoctriner  et  examiner  principallement  la  ieunesse,  est  quasi  partout  en  mespriz:  nous  sommes  de  cest  advis,  qu'entre  les  principaux  poinctz  de  la  reformation,  soit  la  renovation  de  ceste  coustume.  Par  quoy  il  fauldra  faire  que  par  les  Pasteurs  ou  Diacres  toutes  les  sepmaines  deux  ou  trois  heures,  selon  le  lieu,  soyent  [fol.  127]  employees  au  Catechisme,  en  telle  sorte,  que  ayans  convoque  les  ieunes  enfans  et  ieunes  filles,  on  leur  enseigne  par  ordre  et  le  plus  simplement  que  faire  se  pourra  le  sommaire  de  la  doctrine  chrestienne,  et  que  par  ordre  on  les  escoute  reciter  le  Symbole,  les  dix  commandemens,  l'oraison  du  Seigneur,  la  doctrine  de  la  foy  iustifiante,  des  Sacremens,  de  penitence,  des  bonnes  oeuvres  et  des  afflictions.  Car  nous  devons  estimer,  que  la  plus  pure  partie  de  l'Eglise  est  la  ieunesse  bien  instituee.  Parquoy,  il  ne  fault  nullement  mespriser  tel  eage,  principallement  a  cause  que  ce  fruict  icy  entre  les  aultres  en  prouvient,  que  quand  cestuy  eage  tendre  est  abbreuve  de  la  doctrine  vraye  et  salutaire,  il  conceoit  tout  incontinent  un  amour  envers  la  Religion  chrestienne  :  laquelle  puis  apres,  ainsi  que  l'eage  accroist,  luy  proffite  grandement,  pour  ses  meurs  et  conditions.  Et  les  hommes  peuvent  mieux  iuger  de  toutes  les  doctrines,  desquelles  en  leur  ieune  eage  ilz  ont  bien  apprins  les  elemens.  D'avantage,  c'est  un  dict  assez  vulgaire,  que  c'est  beaucoup  de