48:618  que  Iesus  Christ  est  au  ciel,  nous  devons  estre  certains  qu'il  y  est  pour  interceder  pour  nous.  Car  le  grand  Sacrificateur,  quand  il  entroit  au  sanctuaire,  portoit  sur  sa  teste  les  noms  des  enfans  d'Israel,  et  devant  luy  il  portoit  douze  pierres  qui  signifioyent  les  douze  lignees  du  peuple,  pour  monstrer  que,  combien  il  y  entrast  tout  seul,  toutesfois  c'estoit  pour  tous.  Aussi  puis  que  Iesus  Christ  est  entre  au  ciel,  et  que  la  il  nous  porte,  combien  que  nous  ne  soyons  que  bestes  brutes,  et  nous  porte  aussi  bien  devant  soy,  pour  monstrer  qu'il  nous  ha  en  son  coeur,  il  ne  faut  point  que  nous  prions  Dieu  en  doute,  mais  que  nous  soyons  asseurez  que  nos  prieres  luy  seront  tousiours  agreables,  d'autant  que  c'est  par  Iesus  Christ  que  nous  parlons.  Et  si  ceci  eust  este  bien  entendu,  il  n'y  eust  pas  eu  tant  de  superstitions  en  la  Papaute.  Pourquoy  est-ce  qu'ils  ont  tant  de  patrons?  Pourquoy  est-ce  qu'ils  ont  recours  a  la  vierge  Marie?  C'est  pource  qu'ils  n'ont  iamais  entendu  pourquoy  Iesus  Christ  est  monte  au  ciel.  Car  s'ils  eussent  entendu  qu'il  y  est  monte  pour  estre  nostre  Intercesseur,  ils  n'eussent  pas  dit  qu'ils  n'estoyent  pas  dignes  d'offrir  leurs  requestes  a  Dieu,  et  que  pourtant  il  faloit  avoir  des  advocats.  Mais  ils  eussent  entendu  que,  puis  que  Iesus  Christ  y  est  en  nostre  nom,  nous  y  pouvons  avoir  acces  sans  avoir  des  patrons  et  des  advocats.  Ainsi  voyla  qu'il  faut  cognoistre  en  premier  lieu.  D'avantage  il  y  est  monte  afin  que,  estant  assis  a  la  dextre  de  Dieu  son  Pere,  il  gouverne  le  monde,  et  le  gouverne  en  telle  sorte  qu'il  assiste  tousiours  a  ses  fideles,  et  qu'il  en  ha  un  soin  special.  Si  Iesus  Christ  eust  tousiours  demeure  avec  nous,  outre  ce  que  nous  eussions  este  plus  addonnez  a  superstition,  il  n'eust  pas  eu  ceste  puissance  que  toutes  choses  luy  sont  suietes.  Vray  est  qu'il  l'eust  peu  avoir,  mais  nous  ne  parlons  de  luy  sinon  suyvant  l'ordre  qu'il  a  ordonne  en  son  Evangile.  Et  de  faict,  ce  seroit  folie  de  disputer  s'il  n'eust  pas  peu  faire  ceci  ou  cela  autrement:  car  sa  puissance  est  infinie.  Mais  tant  y  a  qu'il  dit  apres  sa  resurrection,  que  toute  puissance  luy  est  donnee  de  Dieu,  et  aussi  c'est  nostre  creance  qu'il  se  sied  a  la  dextre  de  Dieu  le  Pere  tout-puissant.  Est-ce  a  dire  qu'il  y  ait  la  un  siege,  et  qu'il  y  soit  assis?  Nenni,  nenni:  mais  c'est  qu'il  est  la  assistant  a  la  dextre  de  Dieu  comme  son  lieutenant.  Si  nous  voulions  nous  trouver  devant  ceste  maieste  glorieuse  de  Dieu,  nous  serions  opprimez  et  confus  :  mais  pour  y  avoir  acces  nous  avons  la  Iesus  Christ,  auquel  toutes  choses  sont  suietes  au  ciel  et  en  la  terre.  Or  combien  que  Iesus  Christ  eust  toute  puissance  eternellement,  toutesfois  nous  ne  disons  point  qu'il  soit  seant  a  la  dextre  de  Dieu  iusques  a  ce  que  nous  ayons  dit  qu'il  est  monte  au  ciel.  Voyla  donc  qu'il  a  preeminence  par  tout  apres  son  ascension.