23:618  quod  fratrum  moestitiae  et  anxietati  tam  amice  illacrymat,  insigni  documento  nos  ad  misericordiam  instituit.  Quod  si  nobis  cum  iracundiae  impetu  vel  odii  pertinacia  arduum  est  certamen,  petendus  a  Domino  est  lenitatis  spiritus,  cuius  vis  non  minus  efficaciter  hodie  se  exseret  in  Christi  membris  quam  olim  in  Ioseph.  19.  Numquid  enim  loco  Dei  sum?  Quidam  putant  his  verbis  repudiatum  ab  eo  fuisse  honorem,  ac  si  diceret,  perperam  sibi  deferri,  quia  nonnisi  uni  Deo  debetur,  sed  hoc  nihil  habet  coloris,  quum  saepe  alias  passus  sit  hoc  modo  se  coli,  et  longe  alium  fratribus  animum  esse  sciat  quam  Dei  cultum  in  hominem  mortalem  transferre.  Mihi  etiam  nihilo  magis  probatur  alter  sensus,  quod  se  poenam  sumpturum  neget,  quia  Deus  non  sit.  Neque  enim  ita  sibi  temperabat  a  retalianda  iniuria,  ut  Deum  fore  ultorem  speraret.  Alii  tertium  sensum  afferunt,  quod  respondeat  Ioseph,  consilio  Dei  non  suo  totum  hoc  negotium  gestum  osse:  quem  etsi  non  plane  reiicio,  quia  ad  verum  accedit,  non  tamen  pro  vero  amplector.  Particula  quidem  nnn  nunc  vicem  denotat,  ut  latinum  pro,  nunc  subiectionem.  Itaque  nisi  obstaret  interrogatio,  commode  verteretur,  quia  sub  Deo  ego  sum:  ac  tunc  sensus  esset,  ne  metuatis  quia  ego  sub  Deo  sum:  ut  admoneat  Ioseph,  quia  Dei  imperio  subest,  non  suum  esse  praeire,  sed  sequi.  Verum  quia  praefigitur  n  interrogationi��  nota,  aliter  nequit  exponi,  quoniam  non  esset  consentaneum  ut  se  mortalis  homo  ad  turbandum  Dei  consilium  ingerat.  Porro  quoad  rei  summam,  nulla  ambiguitas.  Nam  quia  Ioseph  divinae  providentiae  finem  expendit,  quasi  iniecto  fraeno  compescit  suos  affectus,  ne  intemperanter  exsultent.  Erat  quidem  miti  humanoque  ingenio:  sed  nihil  est  sedandae  eius  iracundiae  melius  vel  magis  appositum  quam  se  Deo  regendum  submittere.  Itaque  ubi  nos  vindictae  cupiditas  sollicitat,  huc  referendi  sunt  omnes  sensus.  Porro,  quum  hac  ratione  fratres  tranquillos  et  securos  esse  iubeat,  quia  legitimum  Deo  tribuens  honorem,  libenter  sustineat  eius  imperio  parere:  hinc  discamus,  tunc  optime  nobiscum  agi  ubi  negotium  nobis  est  cum  hominibus  modestis,  qui  Deum  sibi  ducem  praeficiunt,  eiusque  placitis  non  modo  subesse  sustinent,  sed  libenter  obsequuntur.  Nam  si  quis  impotenter  carnis  libidine  feratur,  mille  ab  eo  nobis  timendae  erunt  mortes:  nisi  furorem  eius  Dominus  violenter  frangat.  Sicut  autem  unum  hoc  est  sedandae  iracundiae  remedium  agnoscere  quinam  simus,  et  quid  iuris  in  nos  Deo  competat:  sic  rursum  ubi  penitus  insederit  haec  cogitatio,  nullus  est  tam  furiosus  ardor,  ad  quem  mitigandum  non  sufficiat.  21.  Et  vos  cogitastis  de  me.  Probe  (ut  diximus)  Dei  providentiam  considerat  Ioseph,  ut  sibi  non  modo  dandae  veniae,  sed  etiam  exercendae  benefi-