8:617  617  MICHAELIS  SERVETI  618  spiritu  baptizatus  sit.  Atqui  si  hoc  exemplum  instar  generalis  regulae  nobis  esse  debeat,  quid  eunucho,  et  Samaritanis,  et  reliquis  omnibus  fiet,  quos  prius  baptismo  sacrari  Deus  sibi  voluit,  qiiam  spiritu  suo  eos  donaret?  Insulse  ergo  Servetus,  qui  spiritus  gratiam  ad  temporis  momentum  alligat.  Decima  quinta  ratio,  quod  regeneratione  dii  efficimur.  Sunt  autem  dii,  ad  quos  sermo  Dei  factus  est.  Ergo  paedobaptizati  non  sunt  dii,  qui  Dei  sermonem  non  audierunt.  Omittol)  quod  Servetus,  qui  dialecticam  sibi  tam  audacter  arrogat,  syllogismum  unum  conficere  non  potest.  Caeterum  unde  axioma  illud  hausit,  baptismo  nos  effici  deos?  Hoc  tamen  illi  etiam  remitto.  Sed  in  minori  pudenda  est  insulsitas,  quod  Christus  deos  vocet  ad  quos  verbum  Dei  factum  est.  Scimus  honorificum  hunc  titulum  iudicibus  tribui  a  propheta,  quod  Dei  personam  sustineant  in  sua  functione.  Causam  adducit  Christus,  quia  divinitus  iniunctum  est  illis  gubernandi  mandatum.  Servetus  ad  evangelii  praedicationem  id  trahens  flagellum  sibi  conficit  quo  infantes  a  Dei  familia  arceat.  Decima  sexta  ratio,  quod  nova  generatio  esse  nequeat,  nisi  ubi  est  novus  homo,  novus  autem  homo  non  sit,  nisi  per  sermonem  genitus.  Respondeo:  Quos  Deus  secundum  aetatis  gradus  ad  fidem  adducit,  incorruptibili  verbi  semine  regigni:  sed  hoc  non  obstare  quominus  ad  imaginem  suam  refingat  qui  nondum  capaces  sunt  doctrinae.  Decima  septima  ratio  ex  legis  figuris  petitur,  quod  ovis  et  capra  non  statim  ab  egressu  uteri  oblatae  fuerint  [pag.  222]  in  sacrificium.  Sed  quid  si  retorqueam,  primogenita  omnia  simul  ac  vulvam  aperuerant,  Deo  sacra  fuisse?  Quid  si  rursus  obiiciam,  agnum  oportuisse  anniculum  et  tenerum  mactari?  Ubi  iam  erit  illud  virile  robur,  et  plena  perfectio,  quam  in  baptismo  requirit  Servetus?  Decima  octava  ratio  est,  quod  non  possit  ad  Christum  vocari,  qui  non  potest  a  Iohanne  praeparari.  Quanquam  autem  mihi,  si  vellem,  liberum  esset  suum  axioma  Serveto  negare,  de  hac  re  tamen  non  litigabo.  Sit  sane  hoc  generale,  Iohannis  opera  praeparari  Christo  discipulos.  Sed  hoc  inscite  ad  infantes  trahi  respondeo,  quos  ante  in  gregem  suum  cooptat  Christus,  quam  discipuli  esse  possint,  et  quos  pro  suis  agnoscit  nondum  ab  illis  agnitus.  Decima  nona  ratio  est,  quia  doceant  Trismegistus  et  Sibyllae  non  convenire  baptismum  nisi  adultis.  Ergo  pluris  erit  Trismegisti  autoritas,  quam  Dei  ipsius,  qui  circumcisionem  eiusdem  renovationis  ac  puritatis  symbolum  infantibus  communem  esse  voluit?  Deinde  quid  profanus  expiandi  ritus,  quo  usae  sunt  gentes,  baptismo  nostro  affine  habet?  1)  Hoc  commet  deest  in  gallico.