40:617  617  IN  DANIELEM.  CAP.  III.  618  ergo  Daniel  tactus  misericordia  esset,  quaerit  aliquod  levamen  populo  Dei,  non  est  cur  illum  insimulemus  ullius  vitii  :  quia  neque  privatis  commodis  addictus  est,  neque  etiam  honores  appetit  vel  sibi,  vel  sociis:  sed  intentus  est  in  scopum  illum,  ut  scilicet  possint  socii  suppetias  ferre  Iudaeis  laborantibus.  Ergo  autoritas  quam  illis  conciliat,  non  alio  pertinet,  nisi  ut  paulo  humanius  tractentur  Iudaei,  neque  tam  dura  et  acerba  sit  eorum  conditio,  ubi  habebunt  praefectos  ex  suis  popularibus,  qui  fraterne  studeant  illis  prodesse.  Nunc  videmus  Danielem  hac  in  parte  posse  recte  excusari  et  sine  aliquo  fuco  vel  argutia.  Nam  res  ipsa  satis  patet:  deinde  ex  re  colligere  promptum  est,  quia  pius  et  humanus  fuit  affectus  Danielis,  nihil  fuisse  ab  ipso  peccatum.  Quod  dicitur  fuisse  in  porta  regis,  non  debemus  intelligere  ipsum  fuisse  ianitorem.  Quidam  intelligunt  fuisse  in  porta,  quoniam  solebant  illic  iudicia  exerceri.  Sed  transferunt  ad  Chaldaeos  quod  scriptura  de  Iudaeis  docet.  Ego  simplicius  accipio,  Danielem  praefectum  fuisse  praetorio  regis,  ita  ut  summum  imperium  illic  teneret,  et  sensus  ille  magis  est  genuinus.  Deinde  scimus  hanc  fuisse  consuetudinem  et  Chaldaeis,  et  Assyriis,  ut  difficiles  essent  accessus  ad  regem.  Dicitur  ergo  Daniel  esse  in  porta,  quoniam  nemo  poterat  palatium  regis  ingredi,  nisi  eius  permissu.  Sequitur  nunc,  CAPUT  III.  1.  Nebuchadnezer  rex  fecit  imaginem  ex  auro,  altitudo  eius  cubitorum  sexaginta,  latitudo  cubitorum  sex:  erexit  eam  in  planitie  Dura  (alii  faciunt  nomen  appellativum,  et  vertunt  agrum  habitabilem:  sed  rectior  est  illa  interpretatio,  quod  in  planitie  Dura  imaginem  locavit),  in  provincia  Babylonis.  Probabile  est,  non  intra  breve  tempus  erectam  fuisse  hanc  statuam  a  rege  Nebuchadnezer:  neque  hic  notat  propheta  quam  multi  anni  effluxerint:  sed  tamen  magis  probabile  est,  non  exiguo  tempore  postquam  confessus  fuerat  Deum  Israelis  esse  summum  Deum,  statuam  hanc  fabricasse.  Tamen  quoniam  propheta  hoc  subticet,  non  est  cur  de  re  incerta  litigemus.  Quidam  ex  Rabbinis  putant  erectam  fuisse  statuam  loco  piaculi,  quasi  repellere  voluerit  Nebuchadnezer  somnium  suum,  hoc  est,  effectum  somnii,  hoc  amuleto,  ut  loquuntur.  Sed  divinatio  illa  nimis  frivola  est.  Iam  quaeritur  an  se  ipsum  deificaverit  Nebuchadnezer,  an  vero  erexerit  statuam  hanc  Belo  praecipuo  deorum  apud  Chaldaeos,  vel  finxerit  aliquem  deum  novitium.  Multi  inclinant  in  illam  partem,  quod  voluerit  se  referre