9:616  misericorde  et  non  point  sacrifice  (Osee  6,  6).  Voire,  comme  si  cela  n'eust  point  este  dit  par  le  Prophete  du  temps  que  les  sacrifices  estoyent  estroitement  commandez.  Parquoy  l'intention  de  Dieu  n'a  pas  este  de  permettre  a  son  peuple  l'idolatrie  exterieure,  laquelle  il  avoit  defendue  avec  telle  rigueur:  mais  seulement  de  monstrer  que  les  hypocrites  en  faisant  beaucoup  d'agiots  perdent  leur  temps,  sinon  qu'ils  approuvent  leur  piete  en  gardant  la  seconde  Table.  Pour  mieux  comprendre  ceci,  il  est  a  noter  que  les  ceremonies  ne  sont  rien,  sinon  quand  on  les  rapporte  a  leur  droite  fin:  qui  est  de  servir  Dieu  purement.  Or  pource  que  beaucoup  de  gens  sont  pleins  de  feintise,  et  que  le  coeur  ne  respond  point  au  tesmoignage  qu'ils  rendent  devant  les  hommes:  voila  pourquoy  Dieu  les  ramene  a,  un  autre  examen,  assavoir  de  preud'hommie  et  d'integrite,  et  compassion  envers  les  povres.  Cependant  il  n'entend  pas  d'abolir  la  premiere  Table,  a  ce  qu'on  ne  tienne  conte  de  Dieu,  taschant  de  s'acquitter  de  son  devoir  envers  les  hommes.  Autant  en  est-il  de  la  sentence  qu'il  adiouste:  Qu'au  dernier  iour  Iesus  Christ  dira  a  tous  les  siens,  [page  56]  venez  les  benits  de  Dieu  mon  Pere,  qui  avez  donne  a  manger  et  a  boire  a  ceux  qui  avoyent  faim  et  soif,  etc.  (Matth.  25,  34).  Dont  il  conclud  qu'il  ne  nous  sera  point  reproche  d'avoir  fleschi  les  genoux  devant  les  idoles.  Mais  si  ceste  glose  doit  estre  receue,  il  s'ensuivra  quant  et  quant  que  nul  ne  seroit  condamne  pour  n'avoir  point  creu  a  l'Evangile,  pour  n'avoir  iamais  prie  Dieu,  ny  recognu  ses  benefices,  mesme  pour  avoir  blaspheme  son  Nom.  Car  il  n'est  la  faict  aucune  mention  ny  de  foy,  ny  de  prieres,  ny  d'actions  de  graces:  tellement  que  si  on  vouloit  croire  ce  brouillon,  il  suffiroit  de  s'estre  acquitte  envers  les  hommes,  encores  qu'on  ait  foule  aux  pies  la  maieste  de  Dieu.  Quant  a  ce  qu'il  allegue,  Que  toute  la  substance  de  nostre  salut  gist  en  Iesus  Christ:  il  ne  s'ensuit  pas  que  les  idolatres  soyent  sauves,  d'autant  qu'ils  ne  possedent  point  Iesus  Christ,  quand  ils  se  profanent  en  vilaines  pollutions.  Car  il  nous  faut  revenir  a  ce  principe,  que  Iesus  Christ  renoncera  devant  Dieu  son  Pere  et  ses  Anges,  tous  ceux  qui  l'auront  renonce  devant  les  hommes  (Matth.  10,  33),  voire  quelques  malins  et  pervers  qu'ils  soyent.  Il  replique,  Que  rien  ne  peut  nuire  a  celuy  qui  aime  Dieu  et  ses  prochains.  Ce  que  ie  luy  accorde:  mais  ie  demande  si  c'est  aimer  Dieu  de  le  trahir  et  luy  ravir  son  honneur,  et  se  donner  licence  de  faire  ce  qui  luy  est  en  abomination?  Il  allegue,  Que  tous  ceux  qui  sont  baptisez  n'ont  point  le  coeur  pur:  qui  est-ce  qui  le  nie,  et  contre  qui  debat-il?  Mais  de  conclure  par  cela  que  le  Baptesme  n'est  rien:  c'est  gronder  en  pourceau,  [page  57]  et  non  point  parler  en  homme.  L'Evangile  n'est  pas  une