40:616  Hic  aliud  etiam  additur,  nempe  regem  Nebuchadnezer  extulisse  prophetam  Dei,  et  ornasse  summis  honoribus.  Dictum  fuit  de  praepostero  cultu,  quem  exhibuit  ipse,  et  iussit  ab  aliis  praestari.  Quantum  ad  munera  pertinet  ac  praefecturam,  non  posset  hoc  damnari  vel  quod  Nebuchadnezer  dignatus  fuit  tanto  honore  Dei  servum,  vel  quod  ipse  Daniel  passus  fuerit  ita  se  ornari.  Est  quidem  cavendum  omnibus  Dei  servis,  ne  quaestum  faciant  ex  suo  munere:  praesertim  scimus  pestilentissimum  hunc  esse  morbum,  ubi  prophetae  et  doctores  addicti  sunt  lucro,  vel  facile  recipiunt  oblata  munera.  Ubi  enim  pecuniae  contemptus  non  est,  illi  necesse  est  grassari  multa  vitia:  quoniam  omnes  avari  et  quaestuosi  homines  adulterant  verbum  Dei  instar  cauponum.  Ergo  advigilent  summopere  omnes  prophetae  et  ministri  Dei,  ne  ad  munera  animum  suum  applicent.  Sed  quantum  ad  Danielem  spectat,  potuit  recipere  quod  a  rege  oblatum  erat:  sicuti  etiam  et  Iosepho  licuit  suscipere  praefecturam  totius  Aegypti.  Nec  dubium  est,  quin  Daniel  aliud  spectaverit  quam  propriam  vel  privatam  utilitatem.  Neque  enim  lucro  addictum  fuisse  credibile  est,  quum  tam  patienter  exsilium  tulerit:  deinde  quum,  periculo  vitae,  maluerit  abstinere  a  cibis  regiis,  quam  se  alienare  a  populo  Dei.  Quum  ergo  praetulerit  ignominiam  crucis  (quia  tunc  oppressus  erat  Dei  populus)  et  opulentiae,  et  delitiis,  et  honoribus,  quis  putavit  fuisse  avaritia  excaecatum,  ut  munera  haec  acciperet?  Sed  quoniam  videbat  filios  Dei  misere  et  crudeliter  premi  a  Chaldaeis,  voluit  ipsorum  miseriis  succurrere,  quantum  in  se  erat.  Quoniam  ergo  sciebat  hoc  futurum  esse  aliquod  levamen  et  solatium  genti  suae,  ideo  passus  est  se  praefici  provinciae.  Et  eadem  etiam  ratio  apud  eum  valuit,  ut  peteret  sociis  suis  aliquem  primatum,  quemadmodum  sequitur,  49.  Et  Daniel  petiit  a  rege:  et  constituit  super  opus  (vel,  administrationem)  provinciae  Babylonis  Sidrach,  Mesach,  et  Abednego:  Daniel  autem  (erat)  in  porta  regis.  Posset  hic  notari  aliqua  ambitio  in  propheta,  quod  honores  venatur  suis  sociis.  Nam  quum  rex  sponte  praefecturam  offerret,  potuit  accipere,  ne  offenderet  animum  superbi  regis  :  fuit  illic  quaedam  necessitas.  Quod  autem  ipse  a  rege  petit,  ut  praefecturas  aliis  deferat,  unde  dicemus  fuisse  ortum?  Quemadmodum  iam  attigi,  posset  hic  Daniel  esse  suspectus  ambitionis:  posset  etiam  ohiici  aliud  crimen,  quod  quaestum  fecerit  ex  doctrina  sibi  divinitus  patefacta.  Sed  potius  respexit  populum  suum,  voluit  oppressis  aliquid  solatii  afferre.  Nam  tyrannice  Chaldaei  tunc  dominabantur  suis  mancipiis  :  et  scimus  Iudaeos  fuisse  toti  mundo  fere  exosos.  Quum