35:616  primer  l'Evangile,  quand  nous  voyons  qu'il  y  a  tant  de  langues  a  loange:  (car  auiourd'huy  non  seulement  ces  caphars  qui  sont  en  toute  la  Papaute,  se  loent  comme  des  putains  pour  blasphemer  contre  Dieu,  et  contre  sa  Parolle,  mais  nous  en  verrons  mesmes  au  milieu  de  nous  de  telles  canailles:)  apres  nous  verrons  aussi  comme  la  cruaute  s'exerce  contre  les  povres  enfans  de  Dieu,  et  qu'on  tient  tous  les  iours  complots  nouveaux,  pour  forger  des  edits  les  uns  sur  les  autres,  afin  d'aneantir  du  tout  ceste  doctrine.  Nous  verrons  les  mocqueries  qui  sont  en  toutes  gens  profanes,  qui  tirent  auiourd'huy  la  langue,  et  qui  voudroyent  abolir  toute  religion.  Quand  donc  nous  voyons  toutes  ces  choses,  il  faut  bien  conclure  que  Dieu  surmonte,  et  que  la  doctrine  est  victorieuse,  et  qu'elle  procede  de  luy.  Ainsi  donc  cela  nous  doit  servir  de  confirmation,  quand  nous  voyons  qu'il  n'y  a  rien  en  ce  monde  qui  soit  pour  avancer  le  regne  de  nostre  Seigneur  Iesus  Christ,  et  la  doctrine  de  son  Evangile,  mais  plustost  que  tous  la  retardent:  et  que  neantmoins  elle  ne  laisse  pas  de  trouver  entree  et  avoir  son  cours.  Cependant  nous  sommes  convaincus  d'ingratitude,  si  nous  tournons  cela  en  scandale,  veu  que  Dieu  nous  appelle  a  soy,  et  nous  monstre  que  c'est  luy  qui  besongne:  par  quoy  nous  devons  conclure,  que  c'est  un  miracle  quand  l'Evangile  prospere  ainsi.  Voyla  en  somme  comme  nous  devons  auiourd'huy  prattiquer  ceste  doctrine.  Or  il  y  a  encores  plus:  c'est  que  Iesus  Christ  devoit  estre  desfigure.  Le  Prophete  a  desia  dit  qu'il  seroit  comme  un  petit  surgeon  :  mais  ceci  est  plus,  qu'il  sera  mesprise,  reiette,  qu'on  ne  daignera  pas  le  regarder,  qu'il  n'y  aura  rien  en  luy  qui  soit  desirable.  Ceci  est  pour  monstrer  que  nostre  Seigneur  Iesus  en  sa  personne,  comme  desia  nous  avons  monstre,  devoit  estre  vilipende  du  monde,  et  souffrir  toute  ignominie,  comme  s'il  eust  este  reiette,  non  seulement  des  hommes,  mais  aussi  de  Dieu.  Or  de  chercher  nostre  salut,  une  chose  si  desirable,  en  celuy  qui  n'ha  nulle  monstre  en  soy,  il  semble  que  ce  soit  un  abus.  Si  faut-il  neantmoins,  que  nous  surmontions  ceste  tentation,  pour  venir  a  Iesus  Christ.  Et  ceci  estoit  bien  necessaire,  premierement  a  cause  des  Iuifs  qui  tousiours  ont  attendu  un  Royaume  terrien  :  car  c'a  este  une  nation  plene  d'avarice  et  d'orgueil,  tellement  qu'ils  ont  pense  que  Dieu  ne  se  pouvoit  monstrer  pitoyable  envers  eux,  sinon  en  leur  amassant  toutes  les  richesses  du  monde,  et  faisant  qu'ils  vesquissent  en  delices  et  en  pompes.  Voyla  quel  redempteur  ils  ont  espere.  Tant  y  a  que  Dieu  les  avoit  bien  advertis  que  le  Redempteur  seroit  comme  un  petit  surgeon,  qu'il  seroit  reiette  du  monde.  Et  ceste  admonition  ne  leur  a  pas  este  seulement  necessaire,  mais  auiourd'huy  aussi  bien  a  nous:  car  ce  scan-