40:615  615  PRAELECTIONES  616  penderet  rerum  eventus.  Dicitur  enim  Deus  potius  praescire  quae  futura  sunt,  quia  iam  statuerit  quid  fieri  vellet.  Merito  ergo  colligit  Nebuchadnezer  dominium  totius  mundi  esse  in  Dei  manu,  quia  de  rebus  futuris  ita  pronuntiet.  Nisi  enim  quidquid  futurum  est  situm  esset  in  eius  arbitrio,  non  posset  certo  hoc  vel  illud  praedicere.  Quum  ergo  praedicit  quod  futurum  est,  inde  certo  statuitur,  ab  ipso  etiam  cuncta  ordinari,  ut  nihil  fortuito  contingat,  sed  compleat  ipse  quidquid  decrevit.  Discendum  autem  est  ex  hoc  loco,  non  sufficere  si  quis  plenis  buccis,  ut  loquuntur,  celebret  Dei  sapientiam  et  potentiam,  nisi  simul  reiiciat  ex  animo  omnes  superstitiones,  et  teneat  sic  unicum  Deum,  ut  alios  omnes  valere  iubeat  et  facessere:  quia  non  potest  plenior  exigi  confessio,  quam  quae  hic  profertur:  et  tamen  videmus  ut  Nebuchadnezer  semper  implicitus  fuerit  Satanae  imposturis,  quia  voluit  retinere  falsos  deos  :  et  putavit  hoc  satis  esse,  si  primas  concederet  deo  Israelis.  Discamus  igitur  dandam  esse  operam  in  purgandis  animis  omni  superstitione,  quo  unicus  Deus  occupet  omnes  sensus  nostros.  Interea  notandum  etiam  est,  quam  grave  et  horrendum  iudicium  maneat  et  papistas,  et  similes,  qui  saltem  debuerant  imbuti  esse  pietatis  rudimentis,  dum  fatentur  unum  esse  summum  Deum,  et  interea  permiscent  ingentem  turbam,  et  quasi  proscindunt  potentiam  eius  et  sapientiam,  et  simul  obscurant  quod  hic  dicitur  a  rege  profano.  Nam  papistae  non  tantum  partiuntur  Dei  potentiam,  ita  ut  unusquisque  ex  sanctulis  ipsorum  aliquam  partem  sibi  arroget:  sed  etiam,  quum  loquuntur  de  ipso  Deo,  fingunt  omnia  quidem  praescire,  omnia  tamen  contingenter  fieri,  quoniam  et  liberi  arbitrii  hominum  Deus  creaverit,  deinde  etiam  reliquerit  in  suspenso  omnes  eventus:  ut  coelum  et  terra,  prout  ferunt  merita  hominum  vel  peccata,  nunc  officium  suum  praestent,  nunc  autem  sint  adversa  hominibus.  Est  quidem  hoc  verum  neque  pluere,  neque  esse  calorem,  neque  nubes,  neque  serenum  tempus,  neque  quidquam  aliud  accidere,  nisi  ex  iudicio  Dei:  et  quidquid  adversum  est,  esse  signum  eius  maledictionis:  quidquid  autem  prosperum  est  et  optabile,  hoc  esse  signum  eius  gratiae,  hoc  quidem  verum  est:  sed  ubi  principium  statuunt  papistae  in  hominis  arbitrio,  videmus  ut  Deum  spolient  suo  iure.  Ergo  discamus  ex  hop  loco,  non  minus  Deo  concedere,  quam  illi  tribuitur  a  rege  profano.  Sequitur,  48.  Tunc  rex  Danielem  magnificavit,  et  munera  praeclara  et  magna  dedit  ei  (vel,  munera  multa,  ut  alii  vertunt,  dedit  ei),  et  constituit  eum  super  totam  provinciam  Babylonis,  et  magistrum  procerum  super  omnes  sapientes  Babylonis.