8:614  baptizentur  qui  pro  aetatis  suae  modulo  perfectionem  nondum  capiunt.  Secunda  ratio  est,  quod  Christi  symbola  ad  memoriam  sint  instituta,  ut  quisque  recolat  se  Christo  fuisse  consepultum.  Hic  quoque  deest  principii  petitio.  De  sacra  coena  praescribit  apostolus,  ut  se  prius  examinet  homo,  quam  ad  eam  accedat,  et  huic  mysterio  peculiare  est  Christi  mandatum:  Facite  in  memoriam  mei.  De  baptismo  nihil  usquam  tale  legitur.  Admonet  quidem  Paulus  fideles,  ut  baptismi  sui  finem  expendant.  Sed  quis  sanus  concedet  ad  praesentem  articulum  temporis,  quo  administratur,  trahendum  esse?  Quin  potius  sese  oculis  ingerit  manifesta  illa  quam  notavi  distinctio.*)  In  tertia  ratione  sibi  tam  suaviter  plaudit  Servetus,  ut  syllogismum  insolubilem  se  habere  fingat:  Omnis  qui  non  credit  filio  Dei  manet  in  morte  Adae,  et  ira  Dei  manet  super  eum.  Infans  baptizatus  non  credit  filio  Dei.  Ergo  manet  in  morte  Adae.  Quod  autem  non  credant,  clarum  est:  quia  fides  est  ex  auditu.  Antequam  hunc  gordianum  nodum  solvo,  contrarium  syllogismum  opponam:  Quemcunque  benedicit  Christus,  ab  Adae  maledictione  et  ira  Dei  eximit.  Infantes  autem  ab  eo  benedictos  esse  notum  est.  Ergo  ab  ira  Dei  exemptos  esse  sequitur.  Quid,  quod  Servetus  ipse,  ut  paulo  post  videbimus,  infantes  aeterno  exitio  non  patitur  addici?  Imo  [pag.  217]  beatae  resurrectionis  consortes  fore  docet.  Moriatur  infans  septimo  vel  octavo  mense,  imo  puer  anno  duodecimo:  ad  eum  salutis  per  Christum  partae  gratia  secundum  Servetum  absque  baptismo  perveniet.  Cur  ergo  nobis  axioma  obtrudit  quod  nec  ipse  admittit,  et  a  fide  nostra  prorsus  dissentaneum  esse  non  ignorat?  Caeterum  syllogismi  facilis  est  solutio,  quando  illic  Christus  infantes  ad  tribunal  Dei  non  citat  maledictionis  reos,  sed  tantum  contumacibus  iudicium  denunciat  qui  auditam  evangelii  doctrinam  respuunt.  Hoc  vero  ad  infantes  non  magis  pertinet,  quam  capitalis  poena,  qua  Deus  ulciscitur  rebelles  filios,  qui  violentam  manum  patri  vel  matri  intulerint.  Quia  in  hoc  syllogismo  suum  acumen  miratus  erat  Servetus,  secundum  eiusdem  farinae  attexit:  Quisquis  natus  est  ex  spiritu,  vocem  spiritus  audit,  Iohannis  3.  Paedobaptizatus  non  audit:  ergo  non  est  natus  ex  spiritu.  Verum  quod  ex  tertio  Iohannis  capite  citat,  nusquam  apparet.  Itaque  diruto  fundamento,  totum  aedificium  concidit.  Et  tamen  Serveto  non  concedam  spiritum  ab  infantibus  non  audiri.  Habet  enim  Deus  arcanos  modos  quibus  sua  figmenta  paulatim,  ut  visum  est,  formet.  Ideo  infantes  suo  modo  Christum  induere  dicimus,  quia  eos  amplectitur  Christus,  ut  sua  iustitia  vestiat.  1)  Add.  c'est  qu'on  se  prepare  a  recevoir  la  Cene  devant  qu'y  venir:  estant  baptisez  on  sache  a  quelle  fin.  39*