49:614  sa  volonte,  et  que  ne  soyons  point  si  hardis  d'inventer  une  facon  par  laquelle  nous  soyons  conioints  a  luy.  Voyla  donc  qui  a  ruine  le  peuple  des  Iuifs,  tellement  qu'il  est  dit  qu'ils  se  sont  desnuez.  Car  ils  estoyent  en  la  protection  de  leur  Dieu,  et  ils  s'en  sont  despouillez.  Et  ainsi,  scachons  que  si  nous  voulons  que  Dieu  nous  maintiene  en  sa  garde,  il  faut  que  nous  demeurions  en  la  pure  simplicite  de  sa  Parole,  et  que  nous  n'attendons  pas  de  luy  faire  aucun  service,  sinon  celuy  qu'il  approuve  et  que  nous  voyons  estre  contenu  en  l'institution  qu'il  nous  en  donne.  Voyla  quant  a  ce  passage.  Or  ici  nous  sommes  munis  contre  toutes  les  superstitions  que  le  diable  a  iamais  basties  au  monde.  Il  est  vray  que  les  Papistes  allegueront  ceci  et  cela  pour  donner  couleur  a  leurs  idolatries.  Mais  quoy  qu'il  en  soit,  il  nous  faut  tousiours  la  revenir,  qu'ils  se  sont  par  trop  abusez  en  leurs  mensonges  et  resveries,  quand  ils  ont  controuve  tant  de  moyens  pour  attirer  Dieu  ici  bas.  Au  contraire,  quand  il  descend  a  nous,  c'est  afin  de  nous  attirer  en  haut:  et  veut  que  nous  nous  exercions  en  toutes  les  ceremonies  qu'il  nous  donne  pour  venir  a  son  service  spirituel.  Puis  qu'ainsi  est  donc,  nous  pouvons  despiter  les  Papistes  en  toutes  leurs  superstitions.  Autant  en  est-il  des  Payens.  Et  cependant  nous  avons  nostre  regle  certaine  et  infaillible:  c'est  que  pour  deuement  servir  a  Dieu,  tellement  que  nous  luy  soyons  agreables,  il  faut  faire  ce  qu'il  a  ordonne  par  sa  Parole,  et  non  plus.  Or  passons  outre.  Comme  desia  nous  avons  dit,  sainct  Paul  ne  deduit  pas  au  long  toute  l'idolatrie  dont  il  est  parle  en  Moyse:  mais  il  touche  des  banquets  et  des  ieux  seulement.  Et  pourquoy?  d'autant  que  ce  mal  la  regnoit  en  Corinthe.  Et  c'est  une  prudence  que  doyvent  avoir  ceux  qui  annoncent  la  Parole  de  Dieu,  de  regarder  ce  qui  est  convenable  a  un  peuple.  Et  surtout,  quand  nous  voyons  les  vices  regner,  il  faut  que  nous  avisions  qu'on  s'en  garde,  et  taschions  d'arracher  les  mauvaises  herbes  qui  corrompent  la  bonne  semence.  Si  un  homme,  quand  il  monte  en  chaire,  expose  seulement  l'Escriture  saincte,  et  qu'il  n'ait  point  esgard  a  ce  qui  sera  pour  le  profit  commun  de  ceux  auquels  il  parle,  et  ne  scache  comment  il  les  doit  edifier  :  c'est  une  chose  morte,  il  n'y  a  pas  grande  utilite.  Que  faut-il  donc?  Que  ceux  qui  ont  la  charge  d'enseigner  avisent  bien  quand  le  peuple  sera  entache  de  quelque  mal  et  corruption,  d'y  parvenir  et  s'adresser  la.  Et  ainsi  en  fait  maintenant  sainct  Paul.  Car  il  voit  (comme  nous  avons  dit)  ceste  licence  desbordee  en  la  ville  de  Corinthe,  qu'on  se  fourroit  parmi  les  idolatres,  non  pas  pour  aller  sacrifier  au  Temple,  mais  pour  aller  en  leurs  banquets:  et  ils  monstrent  que  cela  est  idolatrie.  Comme  auiourd'huy,  quand  nous  parlerons  des  idoles,  si  seu-