40:614  admodum  omnes  superstitiosi  perplexi  haerent:  et  si  quando  pertinacius  suas  superstitiones  defendunt,  hoc  fit  temeritate,  quam  illis  diabolus  suggerit,  non  autem  iudicio:  denique  non  sunt  compositae  mentis,  quum  suas  superstitiones  audent  asserere  esse  pias  et  sanctas.  Sed  hic  videtur  Nebuchadnezer  in  speciem  renuntiare  suis  erroribus  :  quasi  diceret,  Hactenus  putavi  alios  esse  deos,  sed  iam  muto  sententiam.  Compertum  enim  habeo  deum  vestrum  esse  principem  omnium  deorum.  Et  certe  si  loquutus  fuisset  ex  animo,  poterat  colligere  se  facere  gravem  iniuriam  suis  idolis,  si  quid  divinitatis  in  illis  esset.  Scimus  enim  deum  Israelis  fuisse  in  summo  odio  atque  etiam  abominatione  profanis  gentibus.  Ubi  extollit  eum  supra  omnes  deos,  cogit  in  ordinem  et  Bel,  et  totam  illam  faecem  falsorum  deorum,  quos  colebant  Babylonii.  Sed,  quemadmodum  diximus,  abripitur  quasi  violenter,  ut  non  cogitet  quid  dicat:  sed  fuit  iste  quasi  enthousiasmos,  quod  Dominus  illum  obstupefecit,  deinde  traxit  in  admirationem,  et  simul  in  praedicationem  suae  potentiae.  Vocat  etiam  dominum  regum:  quo  elogio  illi  vendicat  summum  imperium  in  terra.  Significat  igitur  deum  Israelis  non  tantum  excellere  supra  omnes  deos,  sed  tenere  mundi  huius  gubernacula.  Si  enim  est  dominus  regum,  omnes  etiam  populi  sub  manu  eius  sunt  ac  ditione.  Vulgus  enim  hominum  non  potest  eximi  a  Dei  potestate,  si  continet  sub  se  reges  ipsos.  Tenemus  ergo  quid  significent  haec  verba:  nempe  quidquid  colitur  deorum  subesse  deo  Israelis,  quia  ille  emineat  supra  omnes  deos:  deinde  providentia  eius  mundum  regi,  ut  dominetur  et  populis  et  regibus,  et  omnia  moderetur  suo  arbitrio.  Addit,  esse  revelatorem  arcanorum.  Hoc  unum  est  ex  testimoniis  divinitatis,  quemadmodum  alibi  dictum  fuit.  Nam  Isaias  ubi  vult  probare  unicum  esse  Deum,  haec  duo  sumit  principia,  quod  scilicet  nihil  contingat  nisi  imperio  Dei:  et  adiungit  praescientiam  rerum  omnium  (Isa.  48,  3  sq.).  Haec  duo  coniuncta  sunt  quasi  vinculo  inseparabili.  Nebuchadnezer  tametsi  non  tenebat  quid  vere  proprium  esset  divinitatis:  quia  tamen  hic  impellitur  arcano  spiritus  Dei  instinctu,  ideo  tam  diserte  praedicat  et  potentiam  Dei  et  sapientiam.  Fatetur  ergo  deum  Israelis  excellere  supra  omnes  deos,  nempe  quia  obtineat  potestatem  in  toto  mundo:  deinde  quod  nihil  ei  sit  incognitum.  Et  adiungit  rationem,  quod  Daniel  potuerit  revelare  arcanum  illud.  Videtur  quidem  haec  ratio  non  satis  firma  esse.  Nam  colligit  Dei  unius  imperio  gubernari  mundum,  quod  Daniel  arcanum  patefecerit.  Atqui  nihil  hoc  ad  potentiam.  Sed  facilis  est  responsio.  Diximus  enim  alibi,  Deum  non  esse  nobis  fingendum  similem  Apollini,  qui  tantum  praedicat  res  futuras.  Et  certe  illud  est  nimis  insipidum,  tribuere  Deo  nudam  praescientiam,  quasi  aliunde  quam  ab  eius  arbitrio  39*