5:612  ce  qui  s'est  esleve  entre  nous  contraire  a  la  foy  et  Religion  des  Sainctz,  et  nous  efforceons  de  reduire  tout  a  icelle  foy.  Plustost  comme  ce  ne  seroit  point  une  chose  indecente  et  nuysible,  mais  un  commencement  desirable  de  guarison,  si  en  un  corps  mutile  et  plein  de  playes,  quelques  membres  commenceoyent  a  se  purger  et  guerir,  combien  que  les  aultres  ne  peussent  pas  si  tost  recouvrer  leur  sante:  aussi  quand  Dieu  nous  fera  la  grace  a  nous  Allemans,  lesquelz  il  appelle  les  premiers  a  ce,  de  donner  ordre  a  ce,  que  les  vices  de  la  Religion,  qui  sont  comme  playes,  apostumes  et  pourritures,  dont  toutes  les  nations  ont  este  ia  quelques  temps  deformes  et  defigurees,  soyent  purgees:  cela  n'introduira  nulle  deformite  ou  dissimilitude  au  corps  de  Christ,  c'est  a  dire  en  l'Eglise:  mais  sera  un  commencement  salutaire  et  necessaire,  a  ce  que  tout  le  corps  quelque  foys  revienne  a  une  mesme  purete  et  integrite.  Au  contraire,  si  nous  delayons  a  faire  ceste  reformation  des  Eglises,  tant  necessaire,  non  seulement  nous  differerons  des  aultres  nations,  mais  nous  serons  entre  nous  mesme  distraictz,  divers  et  variables.  Car  Dieu  n'ostera  point  a  ses  serviteurs  l'esprit  de  constance,  mais  comme  il  a  faict  iusques  a  ceste  heure,  il  les  fera  perseverer  iusques  au  dernier  souspir,  en  ce  qu'il  leur  a  donne.  Si  le  reste  des  estatz  refuse  et  reiecte  ceste  saincte  reformation,  ce  sera  non  seulement  pour  faire  les  discors  et  differens  de  rAllemaigne  d'avec  les  aultres  nations,  mais  la  dissipation  en  [fol.  123]  elle  mesme,  et  irriter  une  horrible  vengeance  de  Dieu  et  importable.  Pourtant  que  nostre  Seigneur  Iesus,  lequel  s'est  expose  a  la  mort  pour  son  Eglise,  affin  de  la  sanctifier,  l'ayant  purge  par  le  lavement  d'eaue  en  sa  parolle,  et  affin  de  se  faire  une  Eglise  glorieuse,  n'ayant  ridde  ne  macule,  ne  tache  aucune,  mais  estant  saincte  et  irreprehensible,  veuille  faire  ceste  grace  a  la  maieste  de  l'Empereur,  a  tous  les  Electeurs,  Princes  et  aultres  Estatz  de  l'Empire,  et  a  chascun  d'eux  en  son  endroit,  de  pleinement  congnoistre  en  quelles  fanges  d'ordures  et  en  quelles  miseres  les  Eglises  de  Dieu  sont  plongees  par  tout  le  monde:  affin  que  comme  ilz  ont  este  instituez  par  iceluy  seul  bon  et  vray  Pasteur,  pour  estre  pasteurs  et  gouverneurs  sur  son  tropeau,  ilz  employent  toute  leur  estude  et  affection,  selon  l'auctorite  qu'ilz  ont  receu  d'iceluy  mesme  Iesus  Christ  nostre  Seigneur,  auquel  le  Pere  a  donne  toute  puissance  au  ciel  et  en  la  terre,  ilz  mettent,  dis-ie,  toute  leur  peine  effort  a  ce  que  toutes  les  Eglises  soyent  bientost  par  la  parolle  et  par  l'Esprit  de  Christ  purgees  et  guaranties  de  toutes  corruptions  et  macules,  de  toutes  maladies  et  langueurs  de  superstition,  et  de  mauvaise  vie  et  dissolue,  et  receoi-