35:612  sans  aucune  reputation:  et  puis  elle  estoit  comme  un  tronc  d'arbre  qui  aura  este  coupe,  on  marchera  dessus  et  n'y  aura  nulle  apparence.  Iesus  Christ  donc  a  este  comme  un  petit  surgeon:  mais  il  est  dit  puis  apres,  qu'il  croistra  en  telle  sorte,  qu'il  fera  ombrage  a  tout  le  monde.  Yci  aussi  le  Prophete  monstre  qu'il  faloit  que  nostre  Seigneur  Iesus  fust  ainsi  mesprise  du  commencement.  Car  ci  cela  n'eust  este  notamment  declare,  on  pouvoit  estre  scandalize  a  bon  droict  voyant  la  venue  de  nostre  Seigneur  Iesus  Christ  estre  ainsi  contemptible  selon  le  monde.  Car  il  estoit  dit,  qu'il  y  en  auroit  tousiours  quelques  uns  assis  sur  le  siege  de  David,  et  que  cest  empire-la  floriroit  cependant  qu'il  y  auroit  soleil  et  lune.  Or  voyla  ceste  maison  Royale  qui  est  comme  rasee  et  aneantie:  et  qui  estimera  que  la  promesse  s'accomplisse  en  la  personne  de  nostre  Seigneur  Iesus  Christ:  car  il  n'y  avoit  plus  apparence  qu'elle  deust  estre  remise  en  estat.  Mais  quand  il  est  dit  que  ceste  maison-la  sera  comme  toute  defaillie,  et  qu'il  n'y  aura  plus  aucune  preeminence  ne  sceptre,  ne  couronne:  et  mesme  qu'on  aura  quasi  honte  de  veoir  une  telle  ruine  et  confusion:  quand  donc  tout  cela  est  declare  par  les  Prophetes,  alors  nous  avons  bonne  entree,  ascavoir  Iesus  Christ.  Et  ne  faut  pas  que  nous  soyons  estonnez,  comme  d'une  chose  nouvelle  et  incognue,  si  Iesus  Christ  apparoist  d'une  facon  si  petite.  Et  de  faict,  ce  n'est  point  seulement  en  ce  lieu  que  le  S.  Esprit  a  ainsi  parle.  Nous  voyons  ce  qui  est  dit  par  Amos,  que  Dieu  redressera  ce  siege  qui  avoit  este  ruine  auparavant,  comme  aussi  ce  passage  est  allegue  au  15  chapitre  des  Actes,  pour  monstrer  que  nostre  Seigneur  Iesus  commencera  a  regner,  quand  il  plaira  a  Dieu  de  reparer  les  choses  qui  estoyent  confuses.  Et  notamment  il  avoit  este  dit  que  ce  Royaume-la  seroit  comme  foulle  au  pied  avec  la  couronne  Royale,  et  qu'il  n'y  auroit  point  de  chef  pour  la  porter,  iusques  a  ce  que  le  Redempteur  veinst  au  monde.  Toutes  ces  choses-la  donc  nous  doyvent  confermer,  afin  que  nous  ne  trouvions  point  estrange  que  les  commencemens  de  nostre  Seigneur  Iesus  Christ  ayent  este  ainsi  petis.  Au  reste,  par  ce  mot  de  terre  deserte,  le  Prophete  entend  qu'il  ne  semblera  pas  que  nostre  Seigneur  Iesus  doyve  croistre,  non  plus  qu'un  arbre  en  un  desert,  ou  il  n'y  a  ni  humidite,  ni  rien  qui  soit.  Le  voyla  donc  comme  un  arbre  desfigure,  par  faute  d'estre  nourri,  et  de  tirer  substance  et  humeur  de  la  terre.  Or  il  est  dit  que  Iesus  Christ  sera  ainsi  du  commencement,  pour  exprimer  qu'il  n'y  aura  point  de  moyens  yci  bas  pour  l'augmenter:  mais  qu'il  prendra  son  accroissement  d'enhaut  et  de  la  vertu  secrete  de  Dieu  son  Pere:  qu'il  ne  sera  point  aide  du  coste  du  monde:  car  il  n'y  a  que  sterilite:  et  cela  n'a  pas  este  seulement  de  sa  nais-