35:610  vertu,  c'est  a  dire,  il  nous  en  a  donne  un  sentiment  vif  en  nos  coeurs,  tellement  que  nous  scavons  que  ce  n'est  point  des  hommes  que  l'Evangile  procede,  mais  de  luy.  Voyla  en  somme  que  nous  avons  a  retenir  de  ce  passage.  Brief,  despitons  hardiment  l'incredulite  et  obstination  de  tous  ceux  qui  sont  rebelles  a  Dieu,  et  marchons  la  ou  il  nous  appelle,  et  acceptons  le  bien  qu'il  nous  offre,  afin  que  nous  ne  soyons  point  coulpables  de  ceste  ingratitude  que  le  Prophete  accuse  et  condamne  yci  en  tous  ceux  qui  n'obeiront  point  a  la  doctrine  de  l'Evangile.  Or  la  dessus  il  monstre  que  les  hommes  ne  daignent  pas  croire  a  Iesus  Christ,  a  cause  qu'ils  le  voyent  comme  desfigure.  Nous  scavons  que  nostre  Seigneur  Iesus  est  appele  pierre  de  scandale  et  d'achoppement,  pource  que  les  hommes  se  vienent  heurter  contre  luy.  Cependant  il  nous  a  este  donne  de  Dieu  son  Pere  a  un  autre  usage:  c'est  que  nous  soyons  fondez  sur  sa  grace,  et  qu'il  soit  comme  une  pierre  pour  nous  soustenir  tous:  car  il  n'y  a  autre  appuy  et  fermete  que  luy.  Nous  sommes  donc  tous  en  bransle,  et  mesmes  l'enfer  est  ouvert  pour  nous  engloutir.  Ainsi  voyla  nostre  salut  qui  n'ha  nul  fondement  en  ce  monde,  mais  ii  faut  que  nous  soyons  appuyez  en  nostre  Seigneur  Iesus  Christ.  Et  voyla  pourquoy  au  huitieme  chapitre  quand  il  est  dit  qu'il  seroit  mis  comme  une  pierre  precieuse,  et  que  le  Temple  de  Dieu  y  seroit  edifie,  une  pierre  ferme  qui  seroit  pour  soustenir  tout  l'edifice,  le  Prophete  adioustoit  aussi  qu'au  royaume  de  Iuda,  et  a  la  maison  d'Israel,  il  seroit  une  pierre  de  scandale.  Suyvant  cela  maintenant,  il  est  dit  que  nostre  Seigneur  Iesus  sera  comme  un  petit  surgeon,  comme  une  racine  venant  en  terre  deserte  et  sterile,  qu'il  sera  mesprise:  on  le  voit,  on  ne  daignera  pas  le  regarder:  que  chacun  destournera  son  visage,  et  qu'on  l'aura  en  detestation.  Voyla  donc  comme  peu  de  gens  croirons  a  l'Evangile:  car  nous  cherchons  tousiours  d'avoir  quelque  belle  apparence  devant  nos  yeux,  nous  voudrions  que  tout  reluisist.  Or  Dieu  a  procede  d'une  autre  facon,  quand  il  nous  a  voulu  racheter:  car  (comme  dit  sainct  Paul)  d'autant  que  le  monde  n'a  peu  faire  son  profit  de  la  sagesse  de  Dieu,  quand  il  s'est  declare  Createur,  tellement  que  par  regarder  le  ciel  et  la  terre  on  pouvoit  venir  a  luy,  il  a  change  de  mode,  et  a  use  comme  d'une  espece  de  folie  pour  nous  enseigner.  Car  (comme  i'ay  dit)  nous  devions  bien  estre  enseignez  par  ceste  sagesse  admirable  de  Dieu,  qui  apparoist  haut  et  bas  a  tout  le  monde,  mais  nous  y  avons  este  estourdis.  Dieu  donc  a  use  comme  d'une  folie,  quand  il  a  envoye  son  Fils  unique,  qu'il  l'a  assuieti  a  toutes  nos  infirmitez,  qu'il  a  este  reiette  du  monde,  estant  nay  en  une  estable,  quand  toute  sa  vie  il  a  este  comme  un  39