50:61  61  CAPUT  V.  62  sunt  etiam  ethnici:  sed  nemo  eorum  certi  quidquam  habuit,  nemo  iactare  potuit  se  de  re  loqui  sibi  cognita.  Solis  fidelibus  praedicare  hoc  licet,  quibus  verbo  et  spiritu  Dei  testata  est.  Praeterea  notandum  est,  hanc  notitiam  non  esse  universalem  duntaxat,  quasi  fideles  in  genere  solum  persuasi  sint,  statum  filiis  Dei  potiorem  a  morte  fore:  de  se  autem  nihil  habeant  constitutum.  Quantulum  enim  hoc  prodesset  ad  tam  arduam  consolationem?  Sed  singulos  de  se  particularem  scientiam  habere  oportet.  Hoc  enim  est  demum  quod  me  ad  mortem  alacriter  obeundam  animet,  si  certo  sim  persuasus,  me  ad  meliorem  vitam  migrare.  Corpus  quale  nunc  habemus  vocat  domicilium  tabernaculi.  Qualiter  enim  tabernacula  ad  temporalem  usum  exstruuntur  levi  materia,  nec  solido  fundamento,  deinde  paulo  post  diruuntur,  aut  sponte  cadunt:  ita  corpus  mortale  hominibus  datum  est  tanquam  caducum  tugurium,  quod  paucis  diebus  incolant.  Qua  metaphora  usus  est  etiam  Petrus  in  epistola  posteriore  (1,  13.  14):  et  Iob,  quum  vocat  domum  luteam  (Iob  4,  19).  Huic  opponit  aedificium  perpetuae  durationis:  quo  nomine  incertum  est  an  significet  statum  beatae  immortalitatis,  qui  post  mortem  fideles  manet:  an  vero  corpus  incorruptibile  et  gloriosum,  quale  post  resurrectionem  erit.  In  utrovis  sensu  nihil  est  incommodi.  Quamquam  malo  ita  accipere,  ut  initium  huius  aedificii  sit  beatus  animae  status  post  mortem:  consummatio  autem  sit  gloria  ultimae  resurrectionis.  Hanc  expositionem  melius  comprobabit  apostoli  contextus.  Epitheta,  quae  adiungit  huic  aedificio,  faciunt  ad  perpetuitatem  melius  confirmandam.  3.  Si  quidem  vestiti.  Restringit  quod  posuit  de  futurae  vitae  certitudine  ad  fideles:  quemadmodum  est  illis  peculiare.  Exuuntur  enim  corpore  etiam  impii:  sed  quia  nihil  in  Dei  conspectum  afferunt  praeter  ignominiosam  nuditatem,  ideo  non  supervestiuntur  corpore  glorioso.  Fideles  autem,  qui  vestiti  Christo  eiusque  iustitia  ornati  in  Dei  conspectu  apparent,  recipiunt  vestem  gloriosam  immortalitatis.  Sic  enim  malo  accipere  quam  secundum  Chrysostomum  et  alios,  qui  nihil  hic  novum  dici  putant:  sed  tantum  repeti,  quod  prius  dixerat  de  superinduendo  aeterno  domicilio.  Duplicem  itaque  vestitum  hic  commemorat  apostolus,  quo  nos  Deus  induit,  iustitiam  scilicet  Christi  in  hac  vita,  et  spiritus  sanctificationem  :  a  morte  vero  immortalitatem  et  gloriam.  Prior  causa  est  secundi:  quia  quos  glorificare  instituit  Deus,  prius  iustificat:  atque  hic  sensus  elicitur  ex  particula  etiam,  quae  amplificandi,  causa  haud  dubie  inserta  est:  ac  si  dixisset  Paulus,  novam  vestem  fidelibus  a  morte  paratam  fore,  siquidem  in  hac  etiam  vita  vestiti  fuerint.  4.  Gemimus  gravati:  eo  quod  non  exui.  Gemunt  etiam  impii,  quia  contenti  non  sunt  praesenti  statu.