47:61  61  CAPUT  HI.  62  maneat.  Altera,  quod  non  impune  effugient  qui  hodie  abrogant  fidem  evangelio,  quando  sacrosancta  est  Dei  veritas.  Hoc  clypeo  munitos  esse  nos  oportet,  ut  adversus  hominum  contumaciam  in  obedientia  evangelii  pergamus.  Tenendum  quidem  hoc  principium  est,  ut  in  Deo  fundata  sit  fides  nostra.  Sed  ubi  Deum  habemus  autorem,  tanquam  supra  coelos  evecti  secure  debemus  totum  mundum  potius  calcare  vel  ex  alto  despicere  quam  ut  nos  quorundam  infidelitas  perturbet.  Quod  testimonium  suum  non  recipi  conqueritur  Christus,  inde  colligimus  verbo  Dei  omnibus  saeculis  hoc  fuisse  quasi  fatale,  ut  apud  paucos  fidem  obtineret.  Nam  ad  maiorem  numerum  et  fere  ad  totum  populi  corpus  pertinet  verbum  non  recipitis.  Quare  non  est  quod  hodie  nos  exanimet  fidelium  paucitas.  12.  Si  terrestria.  Concludit  Christus  Nicodemo  et  similibus  esse  imputandum,  si  in  evangelii  doctrina  minus  proficiant.  Per  se  enim  non  stare  ostendit  quominus  omnes  recte  instituat,  quando  ad  terram  usque  descendit,  ut  nos  in  coelum  attollat.  Hoc  nimis  tritum  vitium  est,  ut  subtiliter  et  argute  doceri  homines  appetant,  hinc  tantopere  bonae  parti  arrident  altae  et  abstrusae  speculationes,  hinc  etiam  minoris  evangelium  aestimant  plerique,  quod  illic  magniloquentiam  non  reperiunt  quae  ipsorum  aures  impleat.  Itaque  in  studio  vulgaris  et  humilis  doctrinae  se  occupare  non  dignantur.  Atqui  nimia  est  ista  improbitas,  quod  ideo  minus  honoris  deferimus  loquenti  Deo,  quia  se  ille  ad  nostram  ruditatem  demittit:  ergo  quod  crasse  et  plebeio  stylo  nobiscum  balbutit  Dominus  in  scriptura,  hoc  sciamus  causa  nostra  fieri.  Quisquis  tali  humilitate  offendi  se  iactat  vel  praetexit,  quominus  Dei  verbo  se  subiiciat,  mentitur.  Qui  enim  Deum  sibi  propinquum  amplecti  non  sustinet,  multo  minus  supra  nubes  ad  eum  evolabit.  Terrestria  quidam  exponunt  rudimenta  spiritualis  doctrinae.  Nam  abnegatio  nostri  quoddam  est  pietatis  tirocinium.  Sed  potius  iis  subscribo,  qui  hoc  ad  docendi  formam  referunt.  Tametsi  enim  coelestis  fuit  tota  Christi  concio,  adeo  tamen  familiariter  loquutus  est,  ut  sermo  ipse  terrestris  quodammodo  posset  videri.  Praeterea  non  debent  verba  haec  restringi  ad  unicam  concionem.  Hic  enim  usitata  quam  tenuit  Christus  docendi  ratio,  hoc  est,  plebeia  simplicitas,  cum  pompa  et  splendore  confertur,  cui  ambitiosi  homines  nimis  cupide  addicti  sunt.  13.  Et  nemo  adscendit  in  coelum,  nisi  qui  descendit  e  coelo,  filius  hominis  qui  est  in  coelo.  14.  Et  sicut  Moses  exaltavit  serpentem  in  deserto,  ita  exaltari  oportet  filium  hominis.  15.  Ut  omnis  qui  credit  in  eum,  non  pereat:  sed  habeat  vitam  aeternam.  16.  Sic  enim  Deus  dilexit  mundum,  ut  filium  suum  unigenitum  daret:  ut  omnis  qui  credit  in  eum,  non  pereat,