33:61  61  IOB  CHAP.  I.  62  mesmes,  et  ce  qu'ils  sont  cruels,  pleins  de  rebellion,  pleins  de  mensonge,  pleins  de  meschancete,  cela  est  venu  de  ce  qu'ils  se  sont  destournez  de  leur  Createur,  comme  l'Escriture  nous  enseigne.  Au  reste  ils  ne  laissent  pas  d'estre  tousiours  sous  la  main  de  Dieu:  et  de  fait  que  seroit-ce  si  nous  n'avions  ceste  cognoissance?  Oar  quand  il  est  dit,  Que  le  diable  est  prince  du  monde,  ce  seroit  pour  nous  effrayer  n'estoit  que  nous  cognussions  qu'il  y  a  une  bride  par  dessus,  qui  le  retient  et  empesche  de  faire  ce  qu'il  voudroit.  Car  si  la  puissance  de  Satan  n'estoit  point  limitee,  il  auroit  incontinent  la  vogue  sur  nous.  Nous  savons  qu'il  ne  demande  que  nostre  perdition,  comme  aussi  il  est  nostre  ennemi  mortel,  ainsi  qu'il  en  est  parle  en  d'autres  passages,  qu'il  circuit  comme  un  lion  bruyant  (1.  Pier.  5,  8),  il  est  tousiours  apres  la  proye  pour  la  devorer.  Si  donc  les  diables  n'estoient  point  subiets  a  Dieu,  et  qu'ils  peussent  attenter  ce  que  bon  leur  semble,  et  qu'ils  eussent  une  licence  desbordee,  et  que  Dieu  ne  les  retinst  point,  helas!  nostre  condition  seroit  bien  miserable:  car  nous  serions  exposez  en  proye  sans  aucun  remede.  Et  ou  seroit  nostre  foy?  quelle  certitude  aurions-nous  d'estre  gardez?  car  nostre  ennemi  est  trop  puissant.  Ainsi  donc  c'est  l'un  des  articles  le  plus  necessaire  que  nous  ayons,  de  savoir  que  le  diable  est  tenu  en  bride,  et  quelque  chose  qu'il  soit  enrage  contre  nostre  salut,  que  neantmoins  il  ne  peut  rien  faire  sinon  d'autant  qu'il  luy  est  permis  d'enhaut.  Et  aussi  l'Escripture  nous  dit  bien  tous  les  deux,  c'est  assavoir  que  Satan  est  le  prince  du  monde,  qu'il  a  son  empire  en  l'air  par  dessus  nous,  et  que  nous  ne  pouvons  rien,  qu'il  nous  peut  devorer  que  nous  luy  sommes  comme  subiets,  que  nous  sommes  ses  esclaves  de  nature,  tenus  en  ses  liens:  et  que  luy  toutesfois  est  subiet  a  Dieu  maugre  qu'il  en  ait.  Or  ces  deux  poincts  sont  divers,  mais  il  n'y  a  point  de  contrariete,  et  tous  les  deux  nous  sont  bien  utiles,  et  nous  apportent  une  bonne  instruction.  Car  quand  l'Escriture  nous  monstre  que  le  diable  a  un  tel  pouvoir,  et  qu'il  regne  ici,  et  que  les  hommes  sont  comme  sous  ses  pieds,  qu'ils  sont  en  sa  tyrannie,  qu'il  les  tient  en  ses  liens,  c'est  afin  que  nous  cognoissions  nostre  povrete.  Car  nous  voyons  quel  est  l'orgueil  des  hommes,  ils  se  glorifient  tellement  qu'ils  se  veulent  eslever  par  dessus  les  nues,  et  en  sagesse,  et  en  vertu,  et  en  tout.  Or  quand  les  hommes  se  sont  ainsi  eslevez,  Dieu  prononce  a  l'opposite,  qu'ils  sont  esclaves  de  Satan,  qu'ils  sont  tenus  sous  sa  servitude.  Allez  -  vous  attribuer  une  grande  noblesse?  Allez-vous  eslever?  mais  le  diable  domine  par  dessus  vous,  quoy  qu'il  en  soit.  Voila  donc  comme  Dieu  rabbaisse  le  caquet  aux  hommes,  et  les  rend  confus.  Apres,  les  a-il  ainsi  humiliez?